भांगरभूंय | प्रतिनिधी
वारखंड- नागझर पंचायतीन खूबच धाडसी आनी क्रांतीकारी निर्णय घेतला. येवकार. गोंयांत सोरो विक्री वरवीं पंचायत, पालिकेक, एकूणच सरकाराक कोट्यांनी रुपयांची येणावळ मेळटा. म्हणटकच सोरो नाकाच अशें कोण म्हणचो ना. तातूंत गोंय पर्यटन राज्य. हांगा पावला पावलार ‘बार बार देखो, हजार बार देखो’. रस्त्या कुशीक आशिल्ले बार बंद करपाचो न्यायालयान आदेश दिल्लो. कारण गाडयेकार गाडी थांबोवन कुट्ट करून येतात आनी मागीर अपघात जातात, अशें ताचें म्हणणें आशिल्लें. 500 मिटर अंतरा मेरेन आशिल्ले बार बंद करपाचेंय थारिल्लें. उपरांत तो आदेश मोव पडलो आनी आतां गोंयांत मेळटा थंय बार दिसपाक लागल्यात. मात, वारखंड – नागझर पंचायतीन हाचे मुखार आपल्या वाठारांत नवे बार नाकात, असो निर्णय घेतला. गांव आदर्श करपाचो हावेसूय पंचायतीन उक्तायला. सध्या इकरा बार आसात. तेय बंद करपाचो थाराव ग्रामसभेंत घेतला. अर्थांत कायदेशीर मार्गान सगलें कितें करपाचें सरपंच गौरी जोसलकार हांणी जाहीर केलां. वारखंड्यां एकूय बार ना, मात नागझर आनी आशिकुशीच्या गांवांनी ते आसात. त्या बारधनयांचें ह्या थारावाचेर म्हणणें कितें, ताचेर फुडली दिका थारतली. पूण पंचायत वाठारांतल्या चडशा गांवकारांचो ह्या बार बंद निर्णयाक तेंको आसतलो!!
महाराष्ट्र आनी हेर राज्यांनी आदर्श गांव आसात. महाराष्ट्रांत तर सरकारी आदर्श गांव येवजण आसा. तिचे वरवीं संबंदीत गांवांक मजत, इनामांय मेळटात. थळाव्या गांवकारांच्या अभिमानाचो हो विशय. अण्णा हजारे (राळेगण सिद्दी), पोपटराव पवार (हिवरे बाजार) हांचे गांव देशभरांत नामनेक पावल्यात. सोलापूरांतल्या मळेगाव (बार्शी) ह्या आदर्श गांवांत फाटलीं 45 वर्सां पंचायतीची वेंचणूक विरोधाविणे जाता. वांगडा गांवांतले सोसायटीचीय वेंचणूक. आदर्श गांवांनी चडशीं थळावीं प्रकरणां ग्रामसभेंत निकालांत काडटात. अंधश्रद्धेक गांवांत थारो दिनात. गांवचे लोक शेतकामांत एकामेकांक मजत, श्रमदान करतात. उक्ताडार संडास करप ना, घाणयारें उदक सोडप ना, सोरो पियेवप ना… हाचोय आसपाव आदर्श गांवांनी जाता.
बार्रां, तावेर्नां बंद करपाचो निर्णय तुस्त करी सारकोच. पूण आसा त्या बेबद्यांचो सोरो सुट्टलो, नवे बेबदे तयार जावचे नात, हो निर्णय सगल्या गांवकारांनी मेळून घेत जाल्यार दुदांत साकर पडटली! रोखडोच शिगमो सुरू जातलो. हे परबेक, नरकासुराची रात, नव्या वर्साची आदली रात तरणाटे पयले खेप सोरो उश्टायतात. हरशीय सहल, पार्टेक बियर, उपरांत सोरो पियेवप जाता. तांचेर पालकांनी, गांवान लक्ष दवरुं येता. गोंय आकारान ल्हान. स्कूटरीन अर्द वर प्रवास केल्यार एकतरी (प्रत्यक्षांत चड) बार मेळटाच. गांवांतले सगले बार बंद जाले म्हणटकच गांवांतल्या लोकांचें व्यसन सुटलें, अशें ना. तें सोडोवपाक वा नव्या कोणाक तें लागचें ना, हे खातीरुय पावलां उखलपाक जाय. गांव आदर्श करपाचे दिशेन वारखंड- नागझर पंचायतीन उबारलां तें पयलें पावल. अजून खूब चलपाचें आसा. हेर पंचायतींनी, पालिकांनी हाचे पसून स्फूर्त घेवन गांवांत एकूय नवो बार सुरू जावचो ना, इतलीच खबरदारी घेतली जाल्यार पसून खूब जालें.
सोऱ्याचे वायट परिणाम कितें जातात, ते सगल्यांक खबरूच आसात. झगडीं जातात. गांवांत फूट पडटा. मागीर ती राजकी, संस्कृतीक, धर्मीक मतभेदांतल्यान जावं. सोऱ्याक लागून जुगार, ड्रग्साचीं व्यसनां लागतात. चोरयो, खून जातात. सोऱ्या वयल्यान मागीर घरांत केस्तांवां. शेजाऱ्यांक त्रास. केन्नाय प्रतिश्ठा (?) म्हूण वा पार्टेक बी सीप घेवपी 100 तल्या 10 जाणांक तरी मागीर सोरो पियेले बगर रावंक जायना, अशें अभ्यासकांचें मत. बेबद्याच्या कुटुंबाक गांवांत मोल, प्रतिश्ठा नासता. बायले- भुरग्यांक मान वयर करून भोंवपाक मेळना, गांवचो लोक लागीं धरिना, सदांच तणावा खाला जगचें पडटा, सोयरिको जायनात…..!! हें सगलें कित्याक लागून तर सोऱ्याक लागून. प्रत्येकान हाचेर विचार करचो. वारखंड- नागझर पंचायतीन सगलो विचार करूनच हो थाराव घेतला आसतलो. आतां तो बेगीन चालीक लागतलो, हे खातीर यत्न करचे. विरोध जातलो. पूण तातूंतल्यान वतकच पंचायतीक एक वेगळें तेज येतलें!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
