भांगरभूंय | प्रतिनिधी
बॉर्डर-गावस्कर ट्रॉफीचे तिसरे टॅस्टींत ऑस्ट्रेलियेक 76 धांवड्यांची मोख मेळ्ळ्या. हांगाच्या होलकर स्टेडियमाचेर चालू आशिल्ले मॅचींत भारताचो दुसरो डाव 163 धांवड्यांचेर सोंपलो. भारताचो डाव सोंपल्या उपरांत अंपायरान दुसऱ्या दिसाचो खेळ सोंपिल्ल्याची घोशणा केली.
काल बिरेस्तारा ऑस्ट्रेलियेन आपलो पयलो डाव 4 बाद 156 धांवड्यां वयल्यान मुखार खेळपाक सुरवात केली आनी ताचो डाव 197चेर सोंपलो. अशे तरेन ऑस्ट्रेलियेन 88 धांवड्यांची आघाडी घेतली. भारता वतीन रवींद्र जडेजा खेरीत आर आश्विन आनी उमेश यादव हांणी दरेकी तीन विकेटी घेतल्यो.
दुसऱ्या डावांत भारताच्या चेतेश्वर पुजारान (59) 35वो अर्द शेंकडो नोंदयलो. जाल्यार श्रेयस अय्यरान 26, मुखेली रोहित शर्मान 12 आनी विराट कोहलीन 13 धांवड्यो केल्यो. अखेरेक आर आश्विनान 16 धांवड्यांची संघर्शपुर्ण खेळी केली.
ऑस्ट्रेलिये वतीन नॅथन लायनान 8 विकेटी घेवन भारताचो डाव गडगडावन उडयलो. पयल्या दिसा भारताचो पयलो डाव 109चेर सोंपिल्लो.
दुसऱ्या डावांत भारताचो एके वटेन विकेटी पडत आशिल्ल्यो. पूण, पुजारान दुसरे वटेन विकेट राखून दवरपाचो यत्न केलो. ताणें स्पिनरांक मजत करपी खेळपट्टीचेर खर संघर्श केलो. पूण, स्टिवन स्मिथान ताची जबरदस्त कॅच धरली. पुजारा बाद जाल्या उपरांत आव्हानात्मक धांवसंख्या उबारपाची आस्त सोंपली.
ते पयलीं भारताच्या दुसऱ्या डावाची सुरवात खाशेली जावंक ना. पांचवे ओव्हरींत शुभमन गिल (5) लायनाच्या बॉलाचेर बोल्ड जालो. ते उपरांत लायनान 15वे ओव्हरींत रोहित शर्माक (15) एलबीडब्ल्यू बाद केलो. चेतेश्वर पुजारा एके वटेन बरो खेळ करतना दिसलो. विराट कोहली ताका साथ दितलो अशी आशेचें चित्र दिसता आसतना कोहली चुकीचो शॉर्ट मारपाक गेलो. मॅथ्यू कुहनेमान ताका 13 धांवड्यांचेर एलबीडब्लू बाद केलो.
लायनान तिसरो धपको दितना रवींद्र जडेजाक (7) एलबीडब्ल्यू बाद केलो. पुजारा एके वटेन विकेट राखून खेळ करतालो आनी श्रेयश अय्यर काल बऱ्या फॉर्मांत दिसलो. ताणें तीन चवके आनी दोन सके मारून 27 बॉलांनी 26 धांवड्यो केल्यो. मिचेल स्टार्काच्या बॉलाचेर ताणें मारिल्ल्या शॉर्टाचेर उस्मान ख्वाजान डायव्ह मारून कॅच धरली. ते उपरांत लायनान भारताक आनीक एक धपको दितना के एस भरताक बोल्ड केलो. ते उपरांत आर आश्विनान 16 आनी उमेश यादव शुन्याचेर बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
