भांगरभूंय | प्रतिनिधी
केरळांतल्या त्रिशूर हांगांच्या इरिंगदापल्ली श्रीकृष्ण देवळांत 11 फूट आनी 800 कील वजनाचो रोबोटीक हती दान केलो. लोखणाचे चौकटी पसून तयार करुन भायल्यान ह्या हतयाक रबर कोटिंग केलां. हतीक ‘रमण’ हें नांव दवरलां. देवळांतल्या ‘नादायिरुथल’ ह्या धर्मीक विधी वेळार हतीक भेट म्हूण दिलो. ताणे ती पुजाय केली. दक्षीण भारतीय चित्रपट अभिनेत्री पार्वती थिरुवोथू हिणें पीपल फॉर एथिकल ट्रीटमेंट ऑफ अॅनिमल्स (पेटा इंडिया) ह्या पशु हक्क गटाच्या सहकार्यान हो हती तयार केला. तो तयार करपाक पांच लाख रुपया खर्च जालो.
देवळाचे धर्मगुरू राजकुमार नंबूदिरी हांणी सांगलें, हो रोबोटीक हती मेळिल्ल्यान देवूळ समिती खोशी आसा. हेर देवळांनी हती पुजे खातीर रोबोटीक हतींचो वापर जातलो, अशी आस्त बाळगता. आतां मेरेन खरो हती पुजे खातीर भाड्यान घेवप खूब खर्चीक आशिल्लें. हालीं हती हिंसाचाराच्यो घडणुको वाडत आसात. देखून देवळान ही प्रथा बंद केल्ली. कलाकार दुबयच्या शाॅपिंग महोत्सवा खातीर हती तयार करता हें आयकून आमी ताका मेळून आमकांय एक हती तयार करपाक सांगलें.
रोबोट हतीची खाशेली गजाल म्हळ्यार तो चलपाक शकता. हतीची तकली, कान आनी शेंपडी हे सगळे हालता. खऱ्या हती भशेन पांच जाण ताचे फाटीर बसूंक शकतात. मिरवणुकेंत ताचो उपेग करूं येता.
माहूत शेंपडेन काम करपाक शकता. शेपडेचेर बसयिल्ल्या स्वीचान हो हती काम करपाक शकतलो दुबय शॉपिंग उत्सवा खातीर हतीचीं शिल्पां तयार करपी त्रिशूरच्या कलाकारांच्या एका पंगडान हो हती तयार केलां.
पेटा इंडियान सांगलां की आतां खरे हती सैमांत रावूंक शकतात. केरळांत दान केल्ल्या हतीक लागून खऱ्या हतींक आपल्या कुटुंबा वांगडा सैमांत रावपाक मेळटलें अशें पेटा इंडियान व्हिडियो ट्विट करुन बरयलां. हतयांक सांबाळपाक खूब खर्च येता. तांकां बांदून दवरचे पडटा. हे बंदखणींतल्यान त्रासांत पडपी हती असामान्य रितीन वागपाक लागतात. तांकां मुक्त जावपाची गरज आसा, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
