भांगरभूंय | प्रतिनिधी
भांगरभूंय । प्रतिनिधी
फोंडेंः सुर्ला- साकोड्डें हांगच्या निकिता नरेश पेडणेकार हिगेल्या घराक आयतारा राती उजो लागलो. फोंडें आनी वाळपय हांगच्यान उजो पालोवपी दलाचे बंब घडणुकेचे सुवातेर पावमेरन घर पुरायपणान लासलें. ताका लागून पेडणेकाराचो संसार उक्ताडार पडला. उज्यान घराचें साडेचार लाखां परस चड लुकसाण जाला. घऱ सारकें करपाक लोकांनी मजत करची तशेंच सरकारान अर्थीक मजत करची अशें निकिता पेडणेकारान मागलां.
निकिता हिच्या घोवाक आठ वर्सां आदी मरण आयिल्लें. दोन भुरग्यांक व्हड करपाची जापसालदारी तिचेर आशिल्ली. तीन म्हयन्यां आदी एका अपघातांत ताच्या पायांक दुखापत जाल्ली. तातूंत फाटल्या आयताराक रातीं 8 वरांचेर तिच्या घराक अकस्मात उजो लागलो. त्या वेळार तागेली धावेच्या वर्गांत शिकपी ईशा ही ट्युशनाक गेल्ल्या ईशांत ह्या आपल्या भावाक हाडपाक गेल्लें. उजो लागतगीर शेजाऱ्यांनी तो पालोवपाचो यत्न केलो आनी उजो पालोवपी दळाक म्हायती दिली. उज्या बंब पावता मेरेन घरांतले सगळें सामान जळ्ळें.
निकिता आनी तागेलीं भुरगीं सध्या लागींच आशिल्ल्या आपल्या मावाच्या घरांत तात्पुरतीं रावतात. इशा 10 वी जाल्यार ईशांत 6वेच्या वर्गांत आसा. थळावी सरपंच प्रिया खांडेपारकारान घराची पळोवणी करून सरकारा कडल्यान अर्थीक मजत मेळोवन दिवपाचें उतर पेडणेकाराक दिलां. पावसा पयलीं घर सारकें करपाची गरज आसा अशें निकितान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
