भांगरभूंय | प्रतिनिधी
भांगरभूंय । प्रतिनिधी
बेळगांवः बेळगांव- गोंय राष्ट्रीय मार्गार अनमोड- रामगनर विभागांत कर्नाटक सरकारान अवजड वाहनांक येरादारी करपाक बंदी घातल्ल्यान उत्तर कर्नाटक आनी गोंयांतल्या अवजड ट्रकवाले 8 मार्चाक रस्ता रोको आंदोलन करतले. व्हो राष्ट्रीय मार्ग चार पदरी करपाचें काम करपाचें आशिल्ल्यान कारवारचो उपायुक्तान 2018 वर्सां मल्टी एक्सल वाहनांक येरादारी करपाक बंदी घातल्ली.
अनमोड- रामनगर विभागांत येरादारीक बंदी घातल्ल्यान ट्रकवाल्यांक बेळगांवांत तशेंच कारवार मार्गान उत्तर कर्नाटांतल्या हेर वाठारांत वचपाक अतिरिक्त 100 किलोमीटर अंतर कापचें पडटा. ताका लागून इंधनाचेर चड खर्च करचो पडटा शिवाय वेळार माल पुरवण करपाक मेळना. 2018 वर्सा घातिल्ले बंदी वांगडाच कारवारच्या उपायुक्तान सप्टेंबर 2020 वर्सा अनमोड- रामनगर वाठारांत सगल्या तरेच्या वाहनांक येरादारी बंदी घातिल्ली. कांय दिसां पयलीं स रोदांचे ट्रक आनी हेर हलकी वाहनां ह्या मार्गा वयल्यान व्हरताले. मात अधिकाऱ्यांनी मल्टी एक्सल वाहनांचेर सामकी बंदी आशिल्ल्यान आमची सामकी गैरसोय जाता, अशें ट्रकवाल्यांनी पत्रकारांक सांगलें.
ट्रकवाल्यांक येरादारीक लागून जाता तें लुकसाण तशेंच गैरसोय मतींत घेवन कर्नाटक आनी गोंयच्या येरादारी अधिकाऱ्यांनी एकमेकां कडेन भासाभास करून कासली तरी उपाय येवजण करची अशें ट्रकवाल्यांची मागणी आसा. ते संबंदात कारवारच्या उपायुक्तात तशेंच उत्तर गोंयच्या जिल्होधिकाऱ्याक एक निवेदन दिवपाचें ताणी थारायलां.
राष्ट्रीय म्हामार्गाच्या अनमोड- रामनगर वाठारांत रातीं 10 तें सकळीं 6 मेरेन येरादारी करपाची मेकळीक दिवपाची मागणी ट्रकवाल्यांनी केल्या. ही मागणी मानून घेतली ना जाल्यार रास्तो रोको आंदोनल करून आंदोलन खर करपाचें तांणी थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
