भांगरभूंय | प्रतिनिधी
आमदारान केली पळोवणी; प्रकल्प सुरू करपा खातीर पालिकेक सुचोवणी
भांगरभूंय । प्रतिनिधी
पेडणें: सुमार पावणेचार कोटी रुपया खर्च करून 2013त उबारिल्लो पेडणें पालिकेचे मालकीचो कोयरा प्रकल्पाचें उक्तावण करपाची गडबड त्या वेळार वयल्या पालिका मंडळान केल्लें. ताचो परिणाम म्हणल्यार आयज हे गजालीक 10 वर्सां जालीं तरीय तो चालीक लागना. ताका लागून लोकांच्या घामाकश्टाचे कोट्यांनी रुपया उदकांत घाल्ले वरी जालां, अशी प्रतिक्रिया थळाव्या लोकांनी दिल्या. 2 मार्चाक पेडणें मतदारसंघाचे आमदार प्रवीण आर्लेकार हांणी पळोवणी केली आनी बेगिनात बेगीन हो प्रकल्प चालीक लावचो, अशी पेडणें पालिकेक सुचोवणी केली.
ह्या वेळार नगराध्यक्ष माधव सिनाय देसाय, उपनगराध्यक्ष तृप्ती सावळ देसाय, नगरसेवक शिवराम तुकोजी, नगरसेवक विष्णू उर्फ बाप्पा साळगांवकार, नगरसेविका उषा नागवेंकार, नगरसेविका राखी कशाळकार, पेडणें पालिकेचे अभियंते संजय पालयेंकार हाजीर आशिल्ले.
10 वर्सां आदीं उक्तावण केल्लो प्रकल्प अजून मेरेन कित्याक चालीक लागूंक ना, असो प्रस्न आमदार आर्लेकार हांणी पालिका मंडळाक विचारलो. त्या वेळार नगराध्यक्षान सांगलें, पालिकेन पालिका संचालनालया कडेन संपर्क केला. पेडणें पालिकेच्या कोयर प्रकल्पाचे कुशीक प्लास्टीक कोयरा पासून इंधन तयार करपी प्रकल्प लेगीत आडावला. त्या प्रकल्पाचो विशय सध्या न्यायालयांत पाविल्ल्यान तो लेगीत अजून चालीक लागूंक ना, अशें नगराध्यक्ष सिनाय देसाय हांणी सांगलें. कोयर प्रकल्प सुरू करिनासतना सुडान भायले भायर ह्या प्रकल्पांतली कांय सुवात एमके ॲरोमॅटीक हे बंगळुरांतले एके कंपनीक लिजाचेर दिल्या. ते कंपनीन थंय प्लास्टिका पासून इंधन तयार करपी प्रकल्प चालीक लावपाचें थारायलां. ते कंपनीचो देशांतलो पयलो प्रकल्प चेन्नय चलता. तांचो दुसरो प्रकल्प ते पेडणें म्हालांत उबारतात, पूण तोवूय अजून मेरेन सुरू जावंक ना. ह्या प्रकल्पाकूय ताकतिकेन भेट दिवन तो प्रकल्प सुरू करचो, अशीय सुचोवणी आमदार आर्लेकार हांणी पालिका मंडळाक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
