भांगरभूंय | प्रतिनिधी
माळेंत 2-0 असो फाटीं आशिल्ल्या ऑस्ट्रेलिया पंगडान तिसरे टॅस्टींत जबरदस्त प्रदर्शन केलें. भारताचो पयलो डाव 109 धांवड्यांचेर गुठलायल्या उपरांत पयल्या दिसाचो खेळ सोंप मेरेन पयल्या डावांत 4 विकेटी वगडावन 156 धांवड्यो केल्यात. अशे तरेन तो सध्या 47 धांवड्यांनी मुखार आसा.
दिसाचे पयलेच ओव्हरींत रोहित शर्मा दोन खेपे बाद आशिल्लो. पूण, ऑस्ट्रेलियेन डीआरएस घेवपाचें धाडस दाखोवंक ना आनी ताका लागून रोहित शर्माक जीवनदान मेळ्ळें. पूण, ताचो रोहिताक फायदो जालो ना. एके वडेन ऑस्ट्रेलिया डीआरएस घेवपाक फाटींफुडें जाताली, जाल्यार रोहित शर्मा धडाधड डीआरएस घेतना दिसलो.
रवींद्र जडेजाचे बॉलिंगेचेर ताणें चार खेपे डीआरएस घेतलो. तातूंतले तीन डीआरएस फुकट गेले. ताका लागून आर आश्विनाच्या बॉलाचेर विकेट आसून लेगीत ती मेळूंक ना. जडेजान उपरांत चार विकेटी घेत ताची भरपाय केली. पूण, भारताचो आतां एकूय डीआरएस बाकी उरूंक ना.
मजगतीं, भारतान टॉस जिखून पयलीं बॅटींग करपाचो निर्णय घेतलो. दोन जीवनदान मेळून लेगीत रोहित शर्मा 12 धांवड्यांचेर बाद जालो. शुभमन गिल (21), चेतेश्वर पुजारा (1) आनी श्रेयश अय्यर (0) हे लेगीत तंबूंत परतले.
विराट कोहली आनी केएस भरत हांणी 25 धांवड्यांची भागिदारी केली. कोहली 52 बॉलांनी 22 धांवड्यो करून एलबीडब्ल्यू बाद जालो. पळयता पळयता भारताचो पयलो डाव 109 धांवड्यांचेर सोंपलो.
ऑस्ट्रेलिये वतीन मॅथ्यू कुहनेमनान 16 धांवड्यो दिवन 5 विकेटी घेतल्यो. नॅथन लियॉनान तीन जाल्यार टॉड मर्फीन एक विकेट घेतली.
ट्रॅव्हिस हेड आनी उस्मान ख्वाजा हांणी सादूर खेळ करपाचो यत्न केलो. पूण, रवींद्र जडेजान धपको दिलो. सवे ओव्हरींत जडेजान हेडाक (9)चेर एलबीडब्ल्यू बाद केलो. जडेजा खातीर रोहितान दोन खेपे डीआरएस घेतलो. पूण, दोनूय खेपे डीआरएस फुकट गेले. पूण, ज्या वेळार आश्विनाच्या बॉलिंगेचेर लाबशेना आड डीआरएस घेवपाची गरज आशिल्ली त्या वेळार रोहितान घेवंक ना. अखेरेक ख्वाजा सयत बॉलरांक नाकापुरो करपी लाबशेनाक जडेजान बाद केलो. लाबशेनान 91 बॉलांनी 31 धांवड्यो केल्यो. बाद जावचे पयलीं ताणें ख्वाजा वांगडा 198 बॉलांनी 96 धांवड्यांची भागिदारी केली.
ख्वाजा एके वटेन विकेट राखून आशिल्लो. पूण, दुसरे वटेन विकेटी पडल्यो. स्टिव स्मिथ ताच्या वांगडा व्हड भागिदारी करतलो अशें दिशिल्लें. पूण, जडेजाच्या बॉलाचेर स्विप मारपाच्या यत्नांत शुभमन गिलान शिमे लागसार कॅच धरली.
ख्वाजा 147 बॉलांनी चार चवक्यांचे मजतीन 60 धांवड्यांचेर खेळटा. ऑस्ट्रेलियेन पयल्या दिसाचो खेळ सोंप मेरेन 4 बाद 156 धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
