भांगरभूंय | प्रतिनिधी
भाशेंत मनशाचें आनी समाजाचें खेरीतपण – ताची वळख घुस्पल्ली आसता. वेगवेगळ्या वाठारां, राज्यां, देशां वा समाजां प्रमाण मनशाची भास बदलता. एका मनशाची मायभास दुसर्या मनशा परस वेगळी आसता. हेंच भाशीक सौंदर्य आनी संस्कृती सांबाळपाक दरवर्सा 21 फेब्रुवारीक संवसारीक मायभास दीस मनयतात.
कोंकणी भाशा मंडळान ह्या निमतान “भास-संवाद” ही कार्यावळ घडोवन हाडली. हो संवाद भाशेचो, आमचे कोंकणी भाशेच्या अस्तित्वाचो आसलो. हे कार्यावळीन फक्त नामनेचे लेखक आनी अभ्यासकच न्हय तर म्हाविद्यालय आनी शाळेच्या विद्यार्थ्यांच्या गिन्यानांत भर घाली.
ह्या वेळार कोंकणी कादंबरीकार, सरस्वती पुरस्कार सम्मानीत लेखक महाबळेश्वर सैल आनी ज्ञानपीठ पुरस्कार प्राप्त ज्येश्ठ लेखक दामोदर मावजो मुखेल सोयरे म्हूण हाजीर आसले. ह्या दोनूय ज्येश्ठ लेखकांच्या मुलाखतींतल्यान आनी तांणी सांगिल्ल्या आपल्या अणभवांतल्यान खूब गजाली स्पश्ट जाल्यो. कोंकणी भाशेची वा साहित्याची सुरवात चळवळींतल्यान जाली. ज्या वेळार कोंकणी आमची मायभास म्हणपाक गोंयकार भिताले तेन्ना कोंकणी साहित्यांतल्यान कोंकणी भाशेक वयर काडपाचें काम ह्या लेखकांनी केले. हें करतना तांच्या वाट्याक आयिल्लें आडमेळें तांणी आमकां सांगले ते आयकून तांचे विशी आशिल्लो आदर आनीकच वाडलो. मनांत आपणेंय कितें तरी हांचे सारको वावर करचो, अशी उर्बा निर्माण जाली. एके राती भितर खंयचोच साहित्यकार घडना, तो घडपाक अणभव, जिद्द, कश्ट आनी सरावाची गरज आसता हें लेगीत स्पश्ट जालें.
महाबळेश्वर सैल हांणी केल्लो प्रस्न “शिक्षण म्हत्वाचे कांय अणभव “ हाची जाप सोदपाक गेल्यार आनीकच चड प्रस्न तयार जातात. पूण “शिक्षणाक अणभव जाय आनी अणभवाक शिक्षण जाय” हें दोनय घटक म्हत्वाचे आसात असो निश्कर्श मेळटा. आमचे पयलींचे चडशें साहित्य अणभवांतल्यान घडलां. शिक्षण ह्या साहित्याचो खूब ल्हानसो भाग आसा अशें दिसता. आतां आमच्या कडेन शिक्षण आसा पूण जाय तितलो अणभव ना देखून पयलीं सारके साहित्य आतां घडना अशें म्हणू येता. दोनय लेखकांनी आपणाक पुरस्कार फावो जाले उपरांत आयिल्लो अणभव सांगलो, तेन्ना गोंया भायर कोंकणी साहित्याची वाडिल्ली लोकप्रियता आनी नवें साहित्य तयार जावपाची गरज आमकां कळ्ळी.
कार्यावळीच्या शेवटाक माची प्रस्नां खातीर उक्ती आसली. तेन्ना आमच्या मनात आशिल्ले खूबशें प्रस्न आनी शंका मेकळेपणान विचारपाची संद मेळ्ळी. साहित्य म्हळ्यार कितें हाचो मूळ अर्थ तशेंच तें कित्याक घडत रावपाक जाय हें स्पश्ट जालें. लेखकांच्या साहित्या बद्दल आनी ते रचपा फाटली प्रेरणा आनी उद्देश आमकां कळ्ळो. कोंकणी भाशेचें बदलतें, विकसीत रूप हे कार्यावळींतल्यान पळोवंक मेळ्ळें.
चित्ररेखा प्रदीप सावंत
9765317684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
