भांगरभूंय | प्रतिनिधी
उपजिल्होधिकाऱ्यान आपयली ताकतिकेची बसका
भांगरभूंय । प्रतिनिधी
वाळपयः सत्तरीच्या उपजिल्होधिकाऱ्यान पियेवपाच्या उदकाचे समस्येचेर चर्चा करपा खातीर 2 मार्चाक बसका आपयल्या. हे बसकेचें सत्तरी म्हालांतल्या सगळ्या पंचायतींच्या सरपंचांक आनी सचिवांक निमंत्रण दिलां, अशी म्हायती सत्तरी जलसंपदा लोकधिकार मंचाचे कार्यकर्ते रामनाथ वरक हांणी दिल्या.
सत्तरी म्हालांतल्या खूबशा गांवांनी आयज लेगीत टँकरांतल्यान उदका पुरवण करतात. 24 वरां पियेवपाच्या उदकाची अजून पुरवण जायना. न्हंयो व्हड प्रमाणांत प्रदुशीत जाल्यात. सैमीक उदकाच्या स्त्रोतांचें संवर्धन करचे खातीर विशेश लक्ष दिवन सत्तरी म्हालांतल्या सगळ्या पंचायतींक हे संबंदांत अहवाल सादर करपाक सांगचो, अशी मागणी करपी निवेदन सत्तरी जलसंपदा लोकाधिकार मंचान सत्तरीच्या उपजिल्होधिकाऱ्याक सादर केल्लें. उपजिल्होधिकाऱ्यान ह्या निवेदनाची दखल घेवन 2 मार्चाक सांजेच्या 4 वरांचेर आपल्या कार्यालयांत बसका आपयल्या.
दिल्ल्या निवेदनाची ताकतिकेन दखल घेतिल्ले खातीर मंचान उपजिल्होधिकारी प्रवीण परब हांचें उपकार मानल्यात. सगळ्या पंचायतीं कडल्यान हे संबंदांत आदार मेळ्ळो जाल्यार पियेवपाच्या उदकाची लोकांक बरी सुविधा मेळपाक शकता, अशें मंचान म्हणलां.
पंचायतीन पियेवपाच्या उदकाचो उणाव पयस करचे खातीर आतां मेरेन कसली उपाय येवजण केल्या, ते संबंदांतली पुराय म्हायती हे बसकेंत सादर करतले. हाका लागून फुडारांत बरे तरेन उपाय येवजण चालीक लावपाक मेळटली. आतां मेरेन पयलेच खेपे अशे तरेचो यत्न जाला. बसकेंत सरपंचांक हे संबंदांत स्पश्टीकरण दिवचें पडटलें, अशें मंचान म्हणलां. सत्तरींतल्या सगळ्याच वाठारांतलो पियेवपाच्या उदकाचो उणाव पयस करून न्हंयांनी जावपी प्रदुशण आडावपा खातीर मंचा वतीन विशेश मोहीम हातांत घेतले. तातूंत कसलेच तरेचीं घाळपणा जावची न्हय हे खातीर मंचाचे कार्यकर्ते बारीक नदर दवरतले, अशें रामनाथ वरक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
