भांगरभूंय | प्रतिनिधी
शेंकड्यांनी वाहनचालकांक तालांव; आडमार्ग बंद करून पळून वचपी चालकांची केली गोची
भांगरभूंय । प्रतिनिधी
वाळपयः गोंयांत सध्या व्हड प्रमाणांत अपघात जावपाक लागल्यात. एका म्हयन्यांत जाल्ल्या खूबशे अपघात जावन खूब जाणांक जीव वगडावचे पडले. हाची दखल घेवन पुलीस खात्यान गोंयांतल्या वेगवेगळ्या वाठारांनी येरादारी नेम मोडप्यां आड दंडात्मक कारवाय करून ताचेर नियंत्रण हाडपाचो यत्न केला. 1 मार्चाक वाळपय पुलीस आनी दिवचल येरादारी पुलीस हांणी जोडपालवान हातांत घेतिल्ले मोहिमेंत नेम मोडपी शेंकड्यांनी वाहनचालकांक दंड फर्मायलो.
वाळपयच्या सरकारी हॉस्पिटला मुखार अचकीत हातांत घेतिल्ले हे मोहिमेक लागून खूब जाणांची धांवपळ जाली. ताका लागून पुलिसांक पळोवन ते मेळत ते वटेन पळून वचपाचो यत्न करपाक लागले. पूण येरादारी नेम मोडपी शेंकड्यांनी वाहनचालकांक धरून तांचेर दंडात्मक कारवाय केली. हे मोहिमेक लागून व्हड प्रमाणांत महसूल एकठांय जाल्ल्याची म्हायती मेळ्ळी.
मेळिल्ले म्हायती प्रमाण वाळपय होंडा वाठारांतल्या रस्त्याचेर वाळपय हॉस्पिटला मुखार अचकीत ही मोहीम हातांत घेतली. थंय व्हड प्रमाणांत पुलीस दवरिल्ले. वाळपय पुलीस निरिक्षक प्रज्योत फडते आनी दिवचल पुलीस येरादारी खात्याच्या अधिकाऱ्यांनी ही मोहीम जोडरितीन हातांत घेतिल्ली.
हे मोहिमेंत हॅल्मेट घालिनासतना दुचाकी चलोवपी आनी गतीन गाडी चलोवप्यां आड कारवाय केली. सांजेच्या 4 वरांच्या सुमाराक ही कारवाय हातांत घेतिल्ली. सांजेच्या 7 वरां मेरेन ही कारवाय चालू आशिल्ली. ह्या वेळार खूब जाणांक तालांव दिलो तशेंच खूबश्यो गाडयो जप्त लेगीत केल्यो. तांचेर कायदेशीर कारवाय करतले, अशें अधिकाऱ्यान सांगलें. म्हत्वाचें म्हणल्यार ही कारवाय अचकीत हातांत घेतिल्ल्यान आडमार्गान पळून वचपाचो कांय चालकांनी यत्न केलो. मात ताची म्हायती मेळटाच तो मार्ग बंद करून कारवाय पंगडान खूब जाणांची गोची केली.
मोहीम चालूच उरतलीः पुलीस निरिक्षक फडते
येरादारी नेम मोडप्यां आड गोंयांत खर मोहीम चालीक लायल्या. ताचोच एक भाग म्हूण ही मोहीम वाळपय शारांत हातांत घेतिल्ली. ह्या वेळार खूब जाणांक दंड घातलो. अशे तरेची कारवाय चालूच उरतली. गाडी चलोवपाचो परवानो नाशिल्ल्यां आड कारवाय करतले. गोंयांत हालींसराक व्हड प्रमाणांत अपघात जावपाक लागल्यात. गाडी चलोवपाचो परवानो नासतना गाडी चलोवप, अती गतीन गाडी चलोवप, हॅल्मेट घालिनासतना दुचाकी चलोवप अशा गुन्यांवां आड 100 परस अदीक लोकांचेर कारवाय केल्या, अशें वाळपय पुलीस निरिक्षक प्रज्योत फडते हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
