भांगरभूंय | प्रतिनिधी
दामोदर मावजो: गोंय विद्यापीठांत जालें पयलें युवा कोंकणी कथा संमेलन
पणजीः साहित्याचे विवीध प्रकार आसात तातूंतलो एक प्रकार म्हणजेच कथा. जे तरेन एक बरो लेखक निर्माण जावप गरजेचें तशेंच एक बरो वाचक तयार जावपूय तितलेंच म्हत्वाचें. कथा ह्या साहित्य प्रकारा खातीर एक माची तयार करपाची गरज आशिल्ली आनी ती आयज विद्यापीठान मेळोवन दिल्या. अशे तरेचे उपक्रम विद्यापीठान फुडाराकूय घडोवंचे. जशें साहित्याक एक हुशार वाचकाची गरज आसता. तेच प्रमाण एक बरो समिक्षक निर्माण करप लेगीत तितलेंच गरजेचें. एखादें साहित्य वाचल्या उपरांत ताचे परिक्षण बरोवप गरजेचें. बरो लेखक जावपाक वाचन, निरिक्षण आनी पर्यटन आसप गरजेचें अशें ज्ञानपीठ पुरस्कार जैतिवंत साहित्यीक दामोदर मावजो हांणी सांगलें.
गोंय विद्यापीठाच्या कोंकणी अध्ययन शाखा आनी कोंकणी सरस्पत मंडळा वतीन आयोजीत केल्ल्या पयलें युवा कोंकणी कथा संमेलनाच्या उक्तावण सुवाळ्याक मुखेल सोयरे ह्या नात्यान मावजो उलयताले. ह्या वेळार माचयेर संमेलनाध्यक्ष अजय बुवा, गोंय विद्यापीठाचे कुलगुरू प्रो. हरिलाल मेनन, प्रो. के. श्रीपाद भट, येवकाराध्यक्ष कोंकणी अध्ययन शाखेचे संचालक डॉ. हनुमंत चोपडेंकार, कार्याध्यक्ष प्रा. नरेश नायक आनी जोड कार्याध्यक्ष गोविंद मोपकार हाजीर आशिल्ले.
आमी जेन्ना संमेलनाक वा परिशदेक वताले तेन्ना खंत भोगताली. परिसंवाद जातालें पूण कथा वाचन कथा कथन जायनासलें. पूण आयज विद्यापीठान हो उपक्रम चालीक लावन उत्कृश्ठ काम केलां. एक साहित्यीकाक जर तुमी आदर्श म्हणून घेतलो जाल्यार लेखक तयार जावपाक चड वेळ लागचो ना. कोंकणी कथेन आयज खंय तरी वळण घेवपाची गरज आसा. आयज कोंकणी कथेक बरें वाचक ना म्हणचे परस एकादी बरी कथा दिवन पळयल्यार आपसुकूच वाचक वर्ग निर्माण जातलो हातूंत दुबाव ना. खंयच्याय साहित्याची समिक्षा करतना ती तटस्तपणान जावप गरजेची अशें, अजय बुवा हांणी सांगलें.
दोन दिसांच्या ह्या संमेलनाक वेगवेगळीं सत्रां आयोजीत केल्लीं. पयल्या दिसा डॉ. जयंती नायक हांचें मूळ स्वर उलोवप जालें. उपरांत पयल्या सत्रांत साहित्य अकादेमी पुरस्कार जैतिवंत लेखक जोफा फेर्नांडीस, हेमंत अय्या आनी नरेश नायक हांची मुलाखत कृपाली नायक आनी गोरख शिरसाट हांणी घेतली. सत्राध्यक्ष डॉ. हमुमंत चोपडेंकार हांचे अध्यक्षते खाला आमंत्रीत युवा कथाकारांच्या वेंचीक कोंकणी कथांचें वाचन जालें. हातूंत गौरांग भांडिये, मानसी धाऊसकार, रजत हेगडे आनी अद्वैत साळगांवकार हांचो आसपाव आशिल्लो. उपरांत कोंकणी कथेचेर आदारीत फिल्म आनी लघुपट प्रदर्शीत जालें.
चवथ्या सत्रांत कोंकणी कथाकार डॉ. प्रकाश पर्येंकार आनी रामनाथ गावडे हांच्या मार्गदर्शना खाला प्रतिक्षा परब, सुजाता कांबळी, दिव्या गोवेकार आनी करिश्मा ताटे हांणी आपली कथा सादर केली.
कार्यावळीच्या समारोप सुवाळ्याक कोंकणी साहित्यीक डॉ. पुर्णानंद च्यारी आनी संमेलनाध्यक्ष अजय बुवा हांणी आपले विचार मांडले. कार्याध्यक्ष प्रा. नरेश नायक हांणी पुराय कार्यावळीचो नियाळ दिलो.
कोंकणी कथा संमेलनाचें पयलें इनाम बाळकृष्ण चोपडेंकार, दुसरें इनाम रेशा च्यारी आनी तिसरें इनाम गौरांग भांडिये हांकां फावो जालें. तशेंच पयलें उमेद वाडोवपी इनाम मानसी धाऊसकार, दुसरें गौरी भालचंद्र आनी तिसरें दिव्या गोवेकार हांकां फावो जालें. गोविंद मोपकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
