हे गिरेस्त कशे जातात ?

भांगरभूंय | प्रतिनिधी

काँग्रेसीन खरें तर म्हादयच्या नांवांन धुमशणां घालूंक जाय आसलीं. गोंयच्या अस्तित्वाचो प्रस्न घेवन निदर्शनां करूंक जाय आलीं. जनता वांगडा येवपाची. गोंय उरलें तर मूं मतदार जगपाचे आनी मतां मारपाचे?

मोदी 2014 त दिल्लींत पावलो आनी अडानी गिरेस्त जालो, असो विरोधी पक्षाचो दावो. राहूल गांधीन लोकसभेंत उलयतना प्रस्न
केलो कीं मोदी दिल्लींत पावतकूच अशी कितें जादू जाली जाका लागून आठ वर्सां भितर उद्देगपती गौतम अडानी संवसारांतल्या 609 नंबरावेल्यान दुसर्‍या नंबराचेर पावलो? खर्‍यांनीच अशी कितें जादू जाली? सगळ्यांकूच पडिल्लो हो प्रस्न. कित्याक पडचोना? आमच्या देशांत कमी उद्देगपती नात. टाटा, बजाज, महिंद्रा, सिंघानिया सारके उद्योगपती तर आपल्या घराण्यांतले दुसरे वा तिसरे पिळगेंतले. धंदो तांच्या जाणट्यांनी सुरू केल्लो. बुन्याद घट आशिल्ल्यान वयलें बांदकाम करप सोपें जाता. पूण तांच्यो वणटी बांदुनूच जायना आनी हे मजले बांदून तयार. ते अजून आसा थंयच आसा म्हणचें पडटलें. आनी काल पयर खंयच नाशिल्ले अकस्मात संवसारांतल्या दुसर्‍या वा तिसर्‍या नंबराचेर कशे पावतात. कशे काय? कशें घडटा हें अजाप?
खरें म्हणल्यार असले प्रस्न म्हजे सारक्या अडाण्याक पडपाचे. राजकारण्यांक वा हेर उद्योगपतींक न्हय. जांकां उद्योग म्हणल्यार कितें आनी तो कसो करपाचो हें खबर आसा तांकां ह्या प्रस्नांच्यो जापो खबर आसताच. रतन टाटान एकदां आपल्या उलोवपांत म्हणलें, ‘आमी उद्योग करतात. ते धंदे करतात.’ म्हाका दिसता हाचे परस बरी जाप कोण दिवंक शकचोना. तरी राहूल गांधी विचारता, ‘अशी कितें जादू जाली?
खरें म्हणल्यार राहूल गांधीन मात्शें फाटल्यान पळोवचेली गरज आसली. मात्शें फाटल्यान पळयल्यार ताका ह्या प्रस्नाची जाप आपशींच मेळपाची. देशांत आणिबाणी लागू जाली आनी उपरांत जायत्यो उलथापालथी जाल्यो. काँग्रेस सत्ता वचून वेगवेगळीं सरकारां देशांत आयलीं. कांय सरकारां थोडे म्हयने चललीं तर कांय थोडे दीस. हांतलेंच एक सरकार व्हि. पी. सिंग हांचे आसलें. व्हिपी सत्तेर आयले आनी धिरूभाय अंबानीच्या रिलायन्स कंपनीचेर हावळ आयली. कंपनीचे शेर सामके तळाक पावले. आतां कंपनी सोंपली अशेंच सगळ्यांक दिशिल्लें. अकस्मात तें सरकार घो जालें आनी आनी आनी …. चड सांगूक जाय?
पेत्रोल पंपार काम करपी मनीस कपड्यांची मील घालता. उपरांत तो वेगवेगळ्यो कंपनी स्थापन करता. शेर मार्केटांतल्यान शेर विकून पयशे उबे करता आनी करतां करतां पेत्रोल कंपनीचो मालक जाता. हें सगळें तो काँग्रेस सरकार सत्तेर येतकूच करता. कशें? व्हि पी सिंग सत्तेर आसतना ताणें कितें केलां तें सोदून काडून ताका सोंपोवंक पळेता आनी सत्ता बदलली म्हणजे तो संवसारांतल्या पयल्या धा गिरेस्तां भितर पावता. हें कशें? हाची जाप कोण दितलो? ही जाप आनी राहूल गांधीन विचारिल्ल्या प्रस्नाची जाप एकूच काय दिसता. कोणतरी गाॅड फादर आसले बगर कोणूच अकस्मात उड्डाणां मारूंक वचना. माथ्यार कोणाचो तरी हात जायच. कोणतरी आपणाक सांबाळूंक आसा म्हणपाचें कळटा तेन्नाच उडयो वाडटात. आनी मजेची गजाल म्हणल्यार आज तीच काँग्रेस त्याच अंबानीक बोट दाखोवन प्रस्न विचारता. अंबानी आसूं वा अडानी, कशे सरले हे वयर? कोणे दाखयली तांकां वाट? इतलो तेंप सत्तेर आशिल्ले काँग्रेसीनूच मूं? मागीर आतां हो शंखनाद कित्याक?
अडानी समुहाचेर आरोप जाले आनी लोकांनी भियेवन पटापट आपणां कडले शेर विकले. चड विक्री जाली म्हणटकूच मोल उणें जातलेंच. आतां काँग्रेसचे कार्यकर्ते एलआयसी आनी बँको बुडल्यो म्हणून बोवाळ घालतात. हांचो बोवाळ आयकून मजाच दिसता. जाणीं बँको बुडोवपाचें मुळावण घालें ताणींच बँको बुडटात म्हणून बोवाळ घालप कितलें सारकें? ह्यो बँको पयलीं खाजगी आसल्यो. त्यो सामान्य लोकां मेरेन पावच्यो म्हणून इंदिराजीन तांचे राष्ट्रीयीकरण केलें. आज मोदीन दर एकल्याचें एकतरी खातें बँकेंत आसचें म्हणून जनधन येवजण केल्या तेच तरेन दर एकल्याक बँकेचो लाव घेवंक मेळचो म्हणून तर बँकांचें राष्ट्रीयकरण केल्लें. पूण कांय मंत्र्यांनी व्होट बँक तयार करूंक मेळत तशीं रिणां वाटलीं आनी बँकांचें घट्टाण केलें. खंयच्या सरकारचे मंत्री आसले हे? ह्यो बँको सांबाळपाक आजवेर उणे उपदव्याप केले नात. आतां तर कितल्यो तरी बँको दुसरे बँकेंत विलीन करून तांकां सांबाळ्ळ्यात. आनी जाणीं ह्यो बँको बुडोवपाचें म्हान कार्य केलें त्याच पक्षाचे कार्यकर्ते आज निदर्शनां करतात हाका कितें म्हणपाचें? बरें अडानीक लागून खर्‍यांनीच बँको त्रासांत पडटात तर एकवेळ समजूं येतालें. पूण सगळ्याच बँकांनी तर हात वयर काडल्यात. बुडपा इतलें रीण दिवंकूच ना म्हणपाचें सांगलां. मागीर हो बोवाळ कित्याक?
लोकसभेच्यो वेंचणुको लागीं पावतात आनी अशे वेळार लोकां मेरेन आपणालें अस्तित्व पावोवपाक कसलेतरी विशय जायच. अडानीन तांकां हो विशय दिला. घालतात हे धुमशणां. पूण हो विशय पावतलो? वेंचणूक तोंडार पावता म्हणल्यार कितें खरें तें लोकांक कळटलेंच. काँग्रेसीन खरें तर म्हादयच्या नांवांन धुमशणां घालूंक जाय आसलीं. गोंयच्या अस्तित्वाचो प्रस्न घेवन निदर्शनां करूंक जाय आलीं. जनता वांगडा येवपाची. गोंय उरलें तर मूं मतदार जगपाचे आनी मतां मारपाचे? पूण गोंयच्या जिवन मरणाचो प्रस्न सोडून हे अडानी फाटल्यान लागल्यात. एक गजाल आमी मतींत दवरपाची गरज आसा, सत्तेर जे कोण येतले ते अडानी -अंबानीकूच वांगडा घेवन भोंवतले. हेच लोक उद्योग चलयतात आनी लोकांक नोकर्‍यो दिवन कुटुंबां चलयतात. विरोधांत आसतना कोणूय तांचे आड उलोवं. सत्तेर येतकूच सत्ताधार्‍यांक तेच जाय आसतात. एकादो व्हिपी सिंग पिसो आसता जो तांकां सोपोवंक उठ्ठा. हे उद्योग सोंपल्यार पोटां कशीं भरपाचीं? अर्थांत कोणूय फटींगपणां करता आसत तर ताका ख्यास्त दिवंकूच जाय. पूण सोरोप सोरोप म्हणून दोरयेक बडोवन अर्थ ना.

अभयकुमार वेलिंगकार
9423884687