भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं आयच्यान हांगाच्या होलकर स्टेडियमाचेर तिसरी टॅस्ट सुरू जातली. चार मॅचींचे माळेंत भारत 2-0 असो मुखार आसा. तिसरी टॅस्ट जिखना फुडें भारत सेगीत चवथे खेपे बॉर्डर-गावस्कर ट्रॉफी जिखतलो. दुसरे वटेन ऑस्ट्रेलिया ही मॅच जिखून भारतांत 19 वर्सांनी दुसरें जैत जोडपाक इत्सूक आसतलो.
भारत हे मॅची खातीर आपलो फूल स्ट्रॅंथ पंगड मैदानांत देंवतलो. जाल्यार ऑस्ट्रेलियेचो मुखेली पॅट कमिन्स कुटुंबीक कारणाक लागून घरा परतून गेला. ताचे गैरहाजेरेंत उप मुखेली स्टिवन स्मिथ पंगडाचें फुडारपण करतलो. जाल्यार कमिन्साचे सुवातेर मिचेल स्टार्काक निमाण्या इकरांत सुवात दिवपाक शकता. स्टार्काचो भारतांतलो बॉलींग रॅकॉर्ड उत्कृश्ट ना. पूण, भारतांत चार टॅस्टींनी खेळटना 263 धांवड्यो केल्यात. जाल्यार फकत सात विकेटी घेवपाक ताका शक्य जालां.
घरच्या मैदानाचेर भारत सदांच बरें प्रदर्शन करता. ऑस्ट्रेलिया आड भारत वट्ट 52 मॅची खेळ्ळा. तातूंतल्यो 23 मॅची भारतान जिखल्यात, जाल्यार 13 मॅचींनी ऑस्ट्रेलियेक जैत फावो जालां. एक मॅच टाय उरल्या जाल्यार 15 मॅचींचो निकाल लागूंक ना.
इंदोरांत ह्या पंगडां मदीं एकूय मॅच जावंक ना. हेर देशां आड दोन मॅची खेळ्ळा आनी दोनूय मॅचींनी जैत जोडलां.
दोनूय पंगडां मदीं वट्ट 104 मॅची जाल्यात. हातूंतल्यो 43 मॅची ऑस्ट्रेलियेन जिखल्यात, जाल्यार 32 मॅचींनी भारतान जैत जोडलां. एक मॅच टाय उरल्या जाल्यार 28 मॅची बादाबाद उरल्यात.
होलकर मैदानाची खेळपट्टी बॅट्समनांक मजत करपी मानतात. आतां मेरेन ह्या मैदानाचेर दोन मॅची जाल्यात आनी दोनूय मॅचींनी पयलीं बॅटींग करतना धांवड्यांचो पावस घाला. न्युझिलॅण्डा आड 557 आनी बांगलादेशा आड 493 धांवड्यो केल्यात. न्युझिलॅण्डा आड विराट कोहलीन आनी बांगलादेशा आड मयंक अग्रवालान दोट्टी शेंकडो मारला.
आयचे मॅचींत लेगीत खेळपट्टी बॅट्समनांक मजत करपी थारुये. पयले दोन बॅट्समनांक मजत करता. तिसऱ्या दिसा सावन खेळपट्टीक वेरो वचपाक सुरवात जाता. निमाण्या दोन दिसांनी स्पिनरांक खूब मजत मेळटा.
माळेंत आतां मेरेन बॉलरांनी आपलो शेक दवरला. पूण, सगल्यांत चड धांवड्यो करपाचे वळेरेंत रोहित शर्मा मुखार आसा. ताणें दोन मॅचींनी खेळटना 183 धांवड्यो केल्यात. हातूंत एका शेंकड्याचो आस्पाव आसा. दुसरे सुवातेर अक्षर पटेल आसा. ताणें 158 धांवड्यो केल्यात. ऑस्ट्रेलियेचो मार्नस लाबशेनान 119 धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
