भांगरभूंय | प्रतिनिधी
भांगरभूंय । खबरां मेज
पणजीः ‘भारत मात की जय” संघा वतीन 1 तें 31 मार्च मजगतीं गोंयांतल्या सगल्या तालुक्यांनी मायभास जागरण अभियान चालीक लायतले. ह्या अभियानांत राष्ट्रीय मातृशक्ती, हिंदू रक्षा म्हाआघाडी, राष्ट्रीय बजरंग दल, विद्या भारती- गोंय, स्वामी विवेकानंद सेवा प्रसार प्रतिश्ठान, श्रीविद्या प्रतिश्ठान अश्यो संस्था आनी संघटना वांटेकार जातल्यो.
शिक्षणांत मायभाशेच्या माध्यमाची गरज ह्या मुद्द्याचेर विज्ञानिक, मानसीक, सांस्कृतीक, राष्ट्रीय आनी नैतिक दिश्टिकोनांतल्या मांडणी आनी जाग्रुताय करपाचें काम अभियानाच्या माध्यमांतल्यान करतले. साबार लोकां मेरेन व्हो विशय पावोवपा खातीर पुराय मार्च म्हयन्यांत तालुक्यांतल्या कार्यकर्त्यां कडल्यान विद्यार्थी, पालक, नागरीक, शिक्षकांक एकठांय हाडटले. मायभाशेंतल्यान शिक्षणाचें म्हत्व पटोवन दिवपी पत्रकां घरां घरांनी वाटपाचें काम जातलें.
मायभाशे संदर्भात भारत माता की जय संघा वतीन दर वर्सा 1 तें 21 फेब्रुवारी मजगती संवसारीक मायभास दिसा मेरेन मायभास माध्यमाच्या शाळांत भुरग्यांक प्रवेश घेवपा विशीं पालकांक तयार करपाची कार्यावळ जाता. 2023-24च्या शिक्षणीक वर्सा सावन पूर्व आनी प्राथमीक पांवड्यार नवें शिक्षणीक धोरण लागू करपाचें गोंय सरकारान थारायलां. हे फांटभूंयेर पालकांनी आनी नागरिकांची जाय ती मनोभूमिका तयार करपा खातीर अभियानाच्या रुपांत भारत मात की जय संघ हे काम करतोलो. सुमार एक हजार बायल आनी दादले कार्यकर्ते ह्या अभियानांत वांटेकार जातले अशें भारत मात की जय संघाचे राज्य संघचालक प्रा. सुभाष वेलिंगकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
