भांगरभूंय | प्रतिनिधी
भांगरभूंय । प्रतिनिधी
म्हापशेंः सगळें काम येवजिल्ले भशेन जायत गेल्यार म्हापशें शारांत जमनीपोंदच्यान वीज केबल्स घालपाचें काम अंदू वर्साच्या डिसेंबर मेरेन पुराय जातलें. सध्या हें काम 60 टक्के पुराय जालां. काम पुराय जातगीर म्हापशें शारांत ओव्हरहेड लायटीच्यो सरयो दिसच्यो नात तशेंच वीज खंडीत जावपाचें प्रकार लेगीत सामके उणे जातले.
वीज पुरवण खंडीत जावची न्हंय तशेंच सुरक्षे खातीर राज्याच्या वीज खात्यान म्हापश्यांत जमनीपोंदच्यान वीज केबल्स घालपाचें म्हत्वाकांक्षी काम सुरू केल्लें. काम पुराय जातगीर जमनीपोंदच्या वीज केबलांतल्यान वीज प्रवाह सोडपाक मात्सो कळाव जातलो अशें वीज खाताच्या अभियंत्यांनी सांगलें. म्हापशेच्या वाठारांत 11 केव्ही उच्च दाबाची केबल्स घालपाचें काम सुरू आसा. पालिका मार्केट, आंगोड, मरड आनी सिने अलंकार वाठारांत कमी दाबाच्यो केबली घालतात. सुमार 117 कोटी खर्चाच्या ह्या कामाक 2022 वर्सा जून म्हयन्याक सुरवात केल्ली.
स- ते सात म्हयन्यां भितर आमी 60 टक्के काम पुराय केला. सद्या हें काम नेटान चल्लां आनी डिसेंबर मेरेन तें पुराय करपाची आमची मोख आसा अशें म्हापशेच्या वीज कार्यालयांतलो सहाय्यक अभिंयतो सावियो फर्नाडीसान सांगलें. चडश्या सुवातांनी कंत्राटदार केबल्स घालपा खातीर होरिझन्टल डायरेक्शनल ड्रिलींग तंत्रगिन्यानान उपेग करता. ताका लागून रस्ते चड फोडचे पडनात. फातराळ वाठारांत जमीन खणून केबली घालच्यो पडटात अशें ताणे सांगलें.
मार्च म्हयन्याचे दुसरे पंद्रशींत मार्केटांत कमी दाबाच्यो केबली घालपाचें काम हातांत घेतले आनी पावसाक सुरवात जावचे पयलीं तें पुराय करतले अशें फर्नांडीसान सांगलें. सध्या कांय एओसीआय फीडर विद्युतभारीत केल्यात, धुळेर, खोर्ली आनी म्हापशें मार्केट वाठारांत आशिल्ल हे फिडर विद्युतभारीत करपाची येवजण आसा अशें तांणे सांगलें. पावसाच्या दिसानी ड्रिलींग काम करपाक मेळचें ना. त्या दिसांत ट्रान्सफॉर्मर जोडपाचें काम करतलें. तांचे लागीं स्लीक रिंग मेन युनीट उबारल्यांत. ट्रान्सफॉर्मर तांकां जोडल्या उपरांत थंयच्यान सगळे वीज पुरवण यंत्रणेचें नियंत्रण जातलें अशी म्हायती ताणे दिली.
जमनी पोंदच्या वीज केबलींतल्यान वीज पुरवण सुरू जातगीर म्हापशेंच्या लोकांक बऱ्या दाबाची वीज मेळटली. वीज खंडीत जावपाचे प्रकार उणे जातले अशें फर्नांडीसान सांगलें.
—————————————————————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
