भांगरभूंय | प्रतिनिधी
तुळशीदास गांवसः चांदेल हसापूर पंचायतीचो थाराव
भांगरभूंय । प्रतिनिधी
पेडणें: पेडणें म्हालांतल्या हसापूर चांदेल पंचायत वाठारांतल्या मुख्य रस्त्याचेर जो अशीर पूल आसा, ते सुवातेचेर नवो पूल बांदचो. ते संबंदांतलो थाराव चांदेल हसापूर पंचायतीन घेतला. ताची कार्यवाही करचे खातीर संबंदीत खात्या कडेन तो थाराव धाडला, अशी म्हायती सरपंच तुळशीदास गांवस हांणी दिली.
मोपा आंतरराष्ट्रीय विमानतळ प्रकल्प सुरू जाले उपरांत ह्या मुख्य रस्त्याच्या कुशीक आशिल्ल्या पुला वयल्यान दिसाक हजारांनी गाडयो वतात. तातूंत अवजड वाहनांचोय आस्पाव आसता. हसापूर चांदेल मार्गान महाराष्ट्रांत वचपा खातीर हो रस्तो फायद्याचो थारता. पोरणो पूल आनी थळाव्या लोकांची गैरसोय लक्षांत घेवन लोकांक येवपाक वचपाक, जालेंच जाल्यार ल्हान गाडयां खातीर फाटल्या 50 वर्सां आदीं हो पूल बांदिल्लो. पूण सध्या लोकसंख्या खूब वाडल्या. रस्ते रूंद जाले, खूबशे नवे बांदले. तातूंत भर म्हूण पेडणें म्हालांत खूबशे प्रकल्प येवपाक लागल्यात. तातूंत मोपा आंतरराष्ट्रीय विमानतळ सुरू जायत सावन चारूय वटांनी गाडयांची संख्या वाडिल्ल्याचें दिसता. फुडारांत हो पूल धोकादायक थारूं येता. ते खातीर सरकारान आदींच ह्या पुलाक समांतर दुसरो पूल बांदचो, अशी थळाव्या लोकांनी मागणी केल्या. 50 वर्सां आदीं गरज म्हूण बांदिल्ल्या ह्या अशीर पुला वयल्यान सध्या अवजड गाडयोय वचपाक लागल्यात. गाडयांचो आकडो पळयत जाल्यार आतां तो पूल अशीर दिसपाक लागला. ह्या पुलाक जोडून एक समांतर रूंद पूल बांदचो, अशी मागणी करपी थाराव चांदेल हसापूर पंचायतीन घेतला आनी तो संबंदीत खात्याक धाडला. ह्या कामाची फाटपुरवण करचे खातीर आमदार प्रवीण आर्लेकार निश्चीत यत्न करतले, असो विस्वास सरपंच गांवस हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
