भांगरभूंय | प्रतिनिधी
जॉन आगियार: मायम सर्तींत अवर लेडी ऑफ ग्रेस हायस्कूल दिवचलेक येस
पणजी: ह्या कांय वर्सांनी धर्तरेचेर धोको वाडला. आमचे पृथ्वीक आमचे खातीर आनी फुडले पिळगे खातीर सुरक्षीत आनी पुश्टीक स्थान करपाची सगळ्यांची जापसालदारकी. दुसरे वटेन धर्तरेर संसाधनांच्या शोशणाक लागून पर्यावरणाचो तोल इबाडला. आमचे वागणुकेचो पुराय पृथ्वीचेर प्रभाव पडटा हें लक्षांत दवरपाक जाय. पृथ्वी आमकां जिवी दवरता. आमच्या अस्तित्वाची गुणवत्ताय हाचे वेल्यान थारता. आधुनीक काळांतले नाटकाचे कलेंत मायम सामकें गरजेचें, अशें नामनेचे कोंकणी कवी, गीतकार जॉन आगियार हांणी म्हणलें.
सेंट बार्थोलोम्यू हायस्कुला वतीन चोडणां ‘सेव्ह अर्थ, सेव्ह लाइफ’ ह्या विशयाचेर आयोजीत आंतरशालेय मायम सर्तींत मुखेल सोयरे म्हणून आगियार उलयताले.
हे सर्तींत अवर लेडी ऑफ ग्रेस हायस्कूल दिवचल, अवर लेडी ऑफ दिवार हायस्कूल, दिवार आनी माई डी डेस हायस्कूल खोर्जुवेें हांकां पयलें, दुसरें आनी तिसरें इनाम फावो जालें. हेर इनामां मर्सेस हायस्कूल, अवर लेडी, मर्सिडीज, सेंट बार्थोलोम्यू हायस्कूल दिवार, दयानंद हायस्कूल, चोडण, बाल भारती विद्या मंदीर, रिबंदर आनी सेंट थॉमस बॉयज एचएस/सेंट थॉमस गर्ल्स हायस्कूल, हळदोणा हांकां फावो जालीं. हे सर्तींत 10 शाळांनी वांटो घेतिल्लो.
हे सर्तींत परीक्षक म्हणून नामनेचे थिएटर कलाकार सिजर डी’मेलो आनी ऑगी डिमेलो आशिल्लेे. ह्या वेळार दोनूय परिक्षकांनी भाशणां केलीं. मुखेल सोयरे आनी परिक्षकांचे हाजेरींत इनामां भेटयलीं.
संस्थेचे वेवस्थापक रेव्ह. अमेरिको रॉड्रिग्स हांणी सगळ्यांक येवकार दिलो. शाळेची मुख्याध्यापिका मनीषा मेंडोन्का हांणी उपकार मानले. शिक्षिका देबोराह फुतार्दो हांणी हांणी मुखेल सोयर्यांची वळख करून दिली. शिक्षिका निलिमा पिंगुळकार हांणी परीक्षकांची वळख करून दिली. केव्हीन डिमेलो आनी सिझर डिमेलो हांचें येरादारीचेर केल्लें चित्रपट विद्यार्थ्यांक दाखयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
