भांगरभूंय | प्रतिनिधी
विश्वजीत राणे: केरी आयोजीत भलायकी शिबिराचो 650 जाणांनी घेतलो लाव
केरी सत्तरी : गोंय मेडिकल कॉलेजींतले वैजकी सेवेचो लाव गांवगिर्या वाठारांतल्या नागरिकांक जावचो. तशेंच गांवगिर्या वाठारांतल्या लोकांनी आपले भलायकेची जतनाय घेवची देखून भलायकी शिबिराचें आयोजन केलां. सत्तरींतल्या गांवगिर्या वाठारांत सगळे तरेच्या भलायकी सेवेची पुरवण करपाचो संकल्प आशिल्ल्याचें भलायकी मंत्री विश्वजीत राणे हांणी सांगलें.
गोंय राज्य भलायकी संचालनालय, गोंय मेडिकल कॉलेज आनी ए. एस. जी. आय हॉस्पिटल हांच्या जोड पालवान केरी सत्तरी हांगा मेगा भलायकी शिबीर जालें. ह्या वेळार मंत्री राणे उलयताले. ह्या शिबिराक केरी पंचायत वाठारांतल्या 650 जाणांनी वांटो घेतलो.
ह्या शिबिराचे उक्तावण कार्यावळीक भलायकी मंत्री विश्वजीत राणे, पर्येंची आमदार डॉ. देविया राणे, भलायकी संचालनालयाचे संचालक डॉ. गीता काकोडकार, गोंय मेडिकल कॉलेजीचे डीन डॉ. शिवानंद बांदेकार, लसीकरण दळाचे मुखेली डॉ. उत्तम देसाय, डॉ. सीयन डिसिल्वा, डॉ. केदार, डॉ. गीता देशमूख, सांखळे सामाजीक भलायकी केंद्राचे वैजकी अधिकारी डॉ. अतूल, वाळपय सामाजीक भलायकी केंद्राचे वैजकी अधिकारी डॉ. रुपचंद नावेलकार, केरी जिल्हो पंचायत वांगडी देवयानी गांवस, केरी सरपंच दिक्षा गांवस, उपसरपंच भिवा गांवस आनी हेर पंच वांगडी, समाज सेवक विनोद शिंदे आनी हेर मानेस्त हाजीर आशिल्ले.
ह्या वेळार जनरल तपासणी, मेडिसीन, शल्यक्रिया, बायलांचो रोग तज्ञ, कांतीचो रोग तज्ञ, दोळ्यांचो तज्ञ, स्तन कॅन्सर तपासणी, दांतांचो तज्ञ अश्या बर्याच डॉक्टरांनी नागरिकांची तपासणी केली. तशेंच ह्या वेळार रगताची तपासणी, वखदांची पुरवण केली.
डॉ. देवीया राणे आनी हेर मानेस्तांनी ह्या वेळार आपले विचार मांडले.
केरी सरकारी माध्यमीक विद्यालयांत ह्या शिबिराचें आयोजन केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
