भांगरभूंय | प्रतिनिधी
कोणेंय हवेंत आरोप केले म्हूण पुलीस कारवाय करपाक शकनात, अशें डीजीपी जसपाल सिंग हांणी हालींच सांगलें. मडगांवच्या एका कसिनो धनया कडल्यान पांच पुलीस 10 लाख मागतात, असो एक व्हिडियो व्हायरल जाल्लो. ताचेर सिंग हांची ही प्रतिक्रिया. म्हणटकच हाचे मुखार कागाळ केली ना, जाल्यार कारवाय जावची ना? न्यायालय केन्नाय सु मोटो म्हणल्यार आपूण जावन दखल घेता, तशी पुलिसांक घेवपाक मेळना? कारण चडशे लोक भियेवन कागाळ करपाक वचनात. मध्यमवर्गीय, कारकूनाची नोकरी करपी, सकाळीं भुती घेवन सांजवेळा नीट घरा येवपी, देवभोळे मनीस सहसा अन्याया आड आवाज काडिनात. मागीर कागाळ करपाची वाटूच पळोवं नाकात. कोणाक जाय त्यो भानगडी, शेणांत फांतर मारल्यार आंगार घाण उसळटली, शाण्यान कोर्टाचीं सोंपणा चडचीं न्हय, ह्या विचारांच्या मनशां कडल्यान व्हडली अपेक्षाय करप योग्य न्हय. दिसा उजवाडी मारामारी, खून करपाचे प्रकार जाल्यात, पूण तरीय गोंयांत हेर राज्यां सारकें जायना. युपी, बिहारांत कांय गुंड बोल्सांत पिस्तुलांच घेवन भोंवतात. तिडक मस्तकाक पावली काय मागीर फुडले व्यक्तीचेर दोन- चार फार मारून ती शांत करप!! गोंयांत अशें आत्र्या पयऱ्यान जायत जाल्यार मागीर विचारपाक नाका.
फक्त फोन आयल्यार वेवसायिक, धंदेकार खंडणी व्हरून दितले.
वरिश्ठ पुलिसांनी तो मडगांवचो व्हिडियो खरो काय बोगस ते तपासपाची गरज आसा. नाजाल्यार असल्या कृत्यांक जल मेळटलें. विरोधी पक्षांनी दोन दीस आवाज करून शांत जायनासतना असल्या प्रकरणांची फाटपुरवण करूंक फावो. राज्यांत नायट लायफ, नायट पर्यटन फाटलो बरोच काळ नेटान चालू आसा. रातीं दोन- अडेज जाय मेरेन दर्यावेळो जाग्यो आसतात. शेनवार, आयतार, सुटये दिसा तर फांतोड जायसर पार्ट्यो आवाजाचें प्रदुशण करतात. कागाळ ना म्हूण पुलीस कारवाय करीनात, अशें कोणें समजूचें न्हय. लोक कागाळ करतात. पूण आवाज करप्यां आड गुन्यांव दाखल जायना, अशें तांचें म्हणणें. पुलिसांनी घुंवळें वखदां आड फाटीं मोहीम चालू केल्ली. सध्या बेशिस्त येरादारी आड मोहीम चालू आसा. तशें हेर गुन्यांवां आडूय ती जावंक जाय. मडगांवां खंडणी घेवपी पुलिसां आड खात्यांतर्गत कारवाय जाल्या. म्हणजे ‘दाल में कुछ काला है’, अशें म्हणपाक हरकत ना.
हें प्रकरण गाजता म्हणसर आतां तृतीयपंथींचें प्रकरण मुखार आयलां. तृतीयपंथींनीच ह्या सेक्स रॅकेटा विशीं म्हायती दिल्या. तो व्हिडियो सोशल मिडियाचेर व्हायरलूय जाला. पर्वरी पुलीस स्टेशनाचेर कागाळ केल्या, अशें तीं सांगतात. म्हणटकच आतां पुलिसांनी तपास आनी कारवाय करपाक हरकत ना. ‘कांय सुत्रधार मिरामार, कळंगुटे आनी हेर कांय शारांनी तृतीयपंथींचें सेक्स रॅकेट चलोवन तांचे कडल्यान म्हयन्याक 30 हजार रुपया घेतात. नाजाल्यार मारपेट करतात. आमकां आतां बरी जीण जगपाची आसा, असो उलो तृतीयपंथी व्हिडियोंत मारतना पळोवंक मेळटा. पुलिसांनी कारवाय करची’, अशी तांची मागणी. कसले- कसले तरेचे गुन्यांव हांगा चलतात, ताची कल्पनाच करपाक येवचीना. हीं सगलीं पाळांमुळां पुलिसांनी खणून काडपाक जाय. समाजानूय तांकां मजत करची. पूण कांय वेंचिक लोक सोडल्यार वयर सांगलां ते प्रमाण, कोण हे भानगडींत पडचेनात.
खूब खूब वर्सां पयलीं सोपुतविधी सुवाळ्यांत ह्या खिणा पसून ‘झिरो टाॅलरन्स टू करप्शन’, अशी जाहीर घोशणा टाळयाच्या कडकडाटांत जाल्ली. आयज सगलें करप्शन, क्रायम दोळ्यां मुखार दिसता आसतना खर कारवाय कित्याक जायना? तें नश्ट करपाक आमची मानसिकताय बदलपाक जाय, ही गजाल खरी, पूण पोटार (फाटीर न्हय) दांडो मारल्यार ह्यो कुप्रथा बंद जातल्यो.
सगलेच पुलीस वायट नात. पुलीस यंत्रणा प्रामाणिकपणान पेंगट बांदून कामाक लागत जाल्यार कितली तत्पर आसा, तें घुंवळे वखदां आडची, बेशिस्त येरादारी आडची मोहीम पळयल्यार दिसता. हीच जिद्द, चिकाटी, मेहनत हेर गुन्यांवांचे बाबतींत घेत जाल्यार आमचें गोंय भांगराळें जावपाक वेळ लागचो ना. राज्यांत, खास करून पर्यटनाचे नदरेन म्हत्वाच्या आशिल्ल्या वाठारांनी गुन्यांवांचीं गिधां भरल्यांत, तांचीं पाखां कापपाक सुरवात करची! नाजाल्यार गोंय आनीक नेटान ‘उडूंक’ लागतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
