भांगरभूंय | प्रतिनिधी
खबरां संस्था
केपटावनः दक्षीण आफ्रिकेक 19 धांवड्यांनी हारोवन ऑस्ट्रेलियेन बायलांचे संवसारीकटी-20 ,सर्तीत सेगीत तिसरे फावट वस्तादपण मेळयलें. न्यूलँड्स मैदानार जाल्ले हे मॅचींत ऑस्ट्रेलियेन जैत मेळयले तेच वांगडा वट्ट 6वे फावट संवसारीक करंडाचेर आपलें नांव कोरातीत केलें.
पयलीं खेळून ऑस्ट्रेलिया पंगडान 6 बाद 156 धांवड्यो केल्यो. 157 धांवड्यांच्या लक्ष्याचो फाटलाव करतना दक्षीण आफ्रिका 20 पंगडांत फकत 6 बाद 137 धांवड्यो करपाक शकलो. ताका लागून पयलेच फावट संवसारीर करंड जिखपाचें तांचे सपन पुराय जावपाक शकलें ना. एल वोल्वार्डान 48 बॉलांत 61 धांवड्यो केल्यो. 17वे ओव्हरींत तें आवट जाल्ल्यान दक्षीण आफ्रिकेची जैताची आस्त थंयच सोपली. आफ्रिकेच्या डावाची सुरवात बरी जाली ना. तझमिन ब्रिट्स 11 धांवड्यो करून आवट जालें. ते उपरांत मारिझान कॅप (11) आनी कॅप्टन सुने लुसा (2) आवट जालें. लॉरा वोल्वार्ड आनी क्लो ट्रायॉन डाव साल्वार करपाचो यत्न केलो. ताणी चवथे विकेटी खातीर 55 धांवड्यांची भागिदारी केली.वस्तादपणाची दुसरे फावट हॅट्ट्रीक
ऑस्ट्रेलियेचो बायल पंगड हाचे पयलीं 2010, 2012, 2014, 2018 आनी 2020 वर्सा चॅम्पियन जाल्लो. ताणी हे टी-20 सर्तींत वस्तादपणाची हॅट्ट्रीक केली. तांणी 2010, 2012 आनी 2014 वर्सा सेगीत तीन फावट वस्तादपण मेळयल्लें. आतां 2018, 2020 आनी 2023 वर्सा व्हो पंगड जैतिवंत थारलो. पयलेच फावट ऑस्ट्रलियेच्या दादल्यांच्या आनी बायलाच्या पंगडान आयसीसी सर्तींत दुसरे फावट वस्तादपणाची हॅट्ट्रीक केल्या.
टॉस जिखून पयलीं खेळटना ऑस्ट्रेलियान बरी सुरवात केली. एलिसा हिली आनी बेथ मुनी हांणी पयले विकेटी खातीर 36 धांवड्यांची भागिदारी केली. हिलीन 20 बॉलांत 18 धांवड्यो केल्यो. तातूंत 3 चौके आशिल्ले. अॅशले गार्डनरान मुनी वांगडा दुसरे विकेटी खातीर 46 धांवड्यांची भागिदारी केली. 21 बॉलांत 29 धांवड्यो करून गार्डनर क्लो ट्रायॉनाच्या बॉलार कॅच आवट जालें. ताणे दोन चौके आनी दोन सके मारले. ग्रेस हॅरीसान 10 जाल्यार कॅप्टन मेग लॅनिंगान 10 धांवड्यो केल्यो. एलीस पेरीन 7 धांवड्यो केल्यो. बेथ मुनीन अर्दशेंकडो केलो. संवसारीक टी-20 सर्तीच्या फायनलींतले दोन अर्द शेंकडो करपी ते संवसारांतले पयली बायल खेळगडी थारलें.
निमणे ओव्हरींत शबनीम इस्मायलान चवथ्या बॉलाचेर एलीस पेरीक आनी पांचव्या बॉलार वेरेहमाक आवट केले. ताका हॅट्ट्रीक करपाची संद आशिल्ली. मात ताहिल मॅकग्रान निमण्या बॉलाचेर एक धांवडी घेतली आनी तागेली हॅट्ट्रीक चुकली. बेथ मुनीन 53 बॉलांत 9 चौके आनी एका सक्यान नाबाद 74 धांवड्यो केल्यो. दक्षीण आफ्रिकेच्या मारिजान कॅन आनी शबनिम इस्मायलान दरेकी दोन विकेटी घेतल्यो. मलाबा आनी ट्रायॉनाक दरेकी एक विकेटी मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
