दरेका गांवाची वळख थंयचे लोककलेंतल्यान जाता

भांगरभूंय | प्रतिनिधी

डॉ. प्रवीण सावंत: सर्वणा जाली धा दिसांची मोरुलो प्रशिक्षण कार्यशाळा

दिवचल: दरेका गांवाची वळख थंयचे लोककलेंतल्यान जाता. ताका लागून गांवची उदरगत जाता. म्हणूनच दरेका नागरिकान आपली कला, संस्कृताय सांबाळूंक जाय. ‘मोरुलो’ हो नाच सर्वण गांवचें खाशेलपण. ह्या नाचांतल्या सर्वण सारक्या गांवाक एक वेगळीच ओळख मेळटा. ही वळख अशीच तिगून दवरप हें दरेका नागरिकाचें कर्तव्य जावन आसा. मोरुलो नाच सादर करतना नाचपी ताल, लय आनी समन्वयान नाच करतात आनी पळोवपी तल्लीन जावन वतात. हें मोरुलो नाचचें खाशेलपण. हे कार्यशाळेंतल्यान मोरुलो नाच शिकिल्ल्या भुरग्यांनी ही कला फुडले पिळगेक दिवन ही परंपरा सासणाची तशीच दवरची, असो उलो झांटये महाविद्यालयाचे ज्येश्ठ प्राध्यापक डॉ. प्रवीण सावंत हांणी मारलो.

शामपुरुष कला पंगड सर्वण हांणी आयोजीत मोरुलो कार्यशाळेच्या समारोपा वेळार डॉ. सावंत मुखेल सोयरे ह्या नात्यान उलयताले. ह्या वेळार आदले सरपंच तशेंच समाज सेवक गोकुळदास सावंत, पंगडाचे अध्यक्ष दत्ताराम सावंत, कला गौरव पुरस्कार फावो जाल्ले गणेश घाडी, विद्याधर सावंत, भिकाजी सावंत आनी हेर मानेस्त हाजीर आशिल्ले.

ह्या वेळार गोकुळदास सावंत हांणी गांव समृध्द आनी सुसंस्कृत जावपाक लोककला तिगून दवरची पडटा. दरेका भुरग्यान एक तरी कला आपणावची. आनी ती लोकां मेरेन पावोवची, अशें तांणी सांगलें.

सर्वण हांगच्या शामपुरुष कला पंगडा वतीन धा दिसांचे मोरूलो कार्यशाळेचें आयोजन केल्लें. ही कार्यशाळा सर्वण शामपुरुष देवस्थानाच्या मंडपांत तशेंच हांगच्या गणेश घाडी हांच्या आंगणांत घेतली, अशी म्हायती शामपुरुष कला पंगडाचे अध्यक्ष दत्ताराम सावंत हांणी दिली.

हे कार्यशाळेक मोरुलो नाच शिकोवपाक दत्ताराम सावंत, गणेश घाडी, नामदेव सावंत, दामोदर सावंत, विश्राम सावंत, गणेश सावंत, विद्याधर सावंत, देवा सावंत , दयानंद सावंत हांणी फुडाकार घेवन, मार्गदर्शन करून धा दिसांची कार्यशाळा येसस्वी केली.

वट्ट 45 भुरगीं हे शार्यशाळेंत वांटेकार जाल्लीं. मानेस्तां हस्तुकीं तांकां प्रमाणपत्रां भेटयलीं.

हे कार्यावळीचें सुत्रसंचालन विनोद सावंत आनी उपकार दत्ताराम सावंत हांणी मानले.

ही कार्यशाळा येसस्वी करपा खातीर डॉ. संदीप सावंत, विनोद सावंत, रुपेश सावंत, गणेश सावंत, वासुदेव सावंत हांणी विशेश सहकार्य केलें.