भांगरभूंय | प्रतिनिधी
बायलांची संवसारीक टी-20 क्रिकेट सर्तीची फायनल आयज सध्याचो वस्ताद ऑस्ट्रेलिया आनी दक्षीण आफ्रिका ह्या पंगडां मदीं जातली. दक्षीण आफ्रिका पंगड पयले खेपे फायनलींत पावला आनी वस्तादपण जोडपाक जाय जाल्यार बळिश्ट ऑस्ट्रेलियाक हारोवपाक खर यत्न करचे पडटले. दुसरे सेमी फायनलींत ताणें इंग्लंडाक स धांवड्यांनी हारोवन सगल्यांक अजापाचो धपको दिल्लो. ऑस्ट्रेलियेन पांच खेपे वस्तादपण जोडलां, जाल्यार सातवे खेपे फायनलींत पावला.
दक्षीण आफ्रिकेन फाटल्या 12 म्हयन्यांनी बरी प्रगती केल्या. पोरूं जाल्ले संवसारीक वन डे सर्तीचे सेमी फायनलींत पाविल्लो. पंगडा कडेन वुलफार्ट आनी ताजमीन ब्रिट्स हांच्या रुपान सर्वोत्कृश्ट ओपनराची जोडी आसा. ब्रिट्स भालो फेक सर्तींत आदली ज्युनियर संवसारीक वस्ताद आसा. पूण, 2012त जाल्ल्या मोटार अपघाताक लागून तिका ऑलिम्पिकांत वांटो घेवपाचें सपन भंगिल्लें.
ऑस्ट्रेलियेक हारोवपाक जाय जाल्यार हे जोडयेक जबरदस्त प्रदर्शन करचें पडटलें. दुसरे वटेन ऑस्ट्रेलियेन पयले सेमी फायनलींत भारताक पांच धांवड्यांनी हारोवन सातवे खेपे फायनलींत सुवात मेळयली. ताचे कडेन उत्कृश्ट खेळगडे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
