भांगरभूंय | प्रतिनिधी
आयच्या युगांत दर एका मनशाक अपडेट रावपाक आवडटा. आमचे फोन, गाडयो, घरां, शिक्षण, सवलती हें सगलेंच हायब्रीड जालां. तातूंत दर एकल्याक आपूण नाविन्यपूर्ण आसपाक जाय, आपली निजाची अशी वळख आसूंक जाय अशें दिसता. विज्ञानान आमकां ‘सरवायव्हल ऑफ द फिटस्ट’ हो सिद्धांत दिला. आतां ‘सरवायव्हल ऑफ इनोव्हेशन’ हो सिद्धांत येतलो काय असो प्रस्न पडटा. आताचे पिळगी जर नाविन्यपूर्ण आसली जाल्यार तग धरतली नाजाल्यार काळा वांगडा कालबाह्य जावपाची शक्यताय आमी न्हयकारपाक शकनात. हे पिळगेक आपली बुद्ध कसाक लावची पडटली आनी ते खातीर सतत ताका अपडेटेड रावचें पडटलें, आपल्या नांवां धव्यार काळें दवरचें पडटलें. हेंच करपाक आदार दिवपाक आनी वाट घालून दिवपाक परिक्रमाचो जल्म जालो. ‘परिक्रमा नॉलेज टर्मिनस’ ही कोंकणी चळवळींत सक्रीय आशिल्ल्या तरणाट्यांनी एकठांय येवन घडयिल्ली संस्था. आपल्याक लागिल्लो नवनिर्मणेचो ध्यास हेरां मदीं रुजोवप ताका वाडोवप आनी चालना दिवप ही संस्थेची पयली वयली मोख आसा.
परिक्रमा कित्याक?
गोंयांत दर वर्सा कितलेशेच उपक्रम जातात. ते विंगड विंगड विशयां कडेन संबंदीत आसतात. आपलो फुडार घडोवपाचे वाटेर आशिल्लो तरणाटो थंय येता, तातूंत आशिल्ल्या सर्तींनी वांटो घेता, इनाम मेळयता आनी वता. फुडल्या वर्सा परत तीच प्रक्रिया. पूण परिक्रमा हो एक असो उपक्रम जो आपल्या उपक्रमांत जावपी वांगड्याच्या नांवार एक दस्तावेज सदांकाळा खातीर दवरून वता. परिक्रमा आपले दर एक उपक्रम राबयतना नवनिर्मिती जातली हाची दखल घेता. उपक्रमांत वांटेकार जावपी वांगड्यां कडल्यान तांचो मजकूर घेवन, ताचेर जाणकारांचे फावो ते सोपस्कर करून एक बरी संशोधनात्मक कृती तयार करून आपली रेपोसिटरी गिरेस्त करता. अशे तरेन परिक्रमाकडेन जोडिल्लो दर एक वांगडी आपल्या नांवाचेर एक दस्ताएवज दवरून वता. हाचे आदीं संशोधन हें मळ फकत महाविद्यालयां, विद्यापीठा हांचे पुरतेंच मर्यादीत आशिल्लें पूण परिक्रमान हें मळ दर एका तरणाट्याखातीर उकतें केलां. तशेंच शिक्षणीक संस्था म्हणल्यार अभ्यास आनी सांस्कृतीक संस्था म्हणल्यार सादरीकरण हें जें समीकरण आशिल्लें तेंय खोडून काडलां. हाका लागून शिक्षणीक आनी सांस्कृतीक ह्या दोनूय संस्थाक आपली बुद्धीक क्षमता दाखोवपाची संद मेळटा.
नॉलेज टर्मिनसाची आंखणी
परिक्रमा नॉलेज टर्मिनस म्हणल्यार दोन दीस जावपी परिक्रमा हो उपक्रम आनी ताचे उपरांत परत एका वर्सांत त्या उपक्रमाक येवप अशें न्ही. ह्या उपक्रमांत एकदां वांटेकार जाल्लो वांगडी सतत हे प्रक्रियेचो भाग जावन आमच्या सांगातान उरता. ह्या दोन दिसांच्या उपक्रमांत येवपी वांगड्याक पयलीं तीन म्हयन्यांआदी जावपी एकेडेमीक फोरमांत येवचें पडटा. थंयच्यान ताची वाटचाल सुरू जाता. एकेडेमीक फोरमांत साबार मळावयले जाणकार तांणी घेतिल्ल्या अणभवांतल्या शिक्षणाचें गिन्यान सगल्यांमेरेन पावयता. भास, नाट्य, कला, संस्कृताय, पत्रकारिता, राजकारण, संगीत अशे कितलेश्याच विशयांचेर भाश्य जालां. आतां मेरेन अशे तरेच्या कितल्याश्याच जाणकारांनी आपल्या गिन्यानांतल्यान एकेडेमीक फोरमाक जैत मेळोवन दिलां. फोरम जाले उपरांत जावपी शिबिरांत दर एका उपक्रमा विशीं वांगड्यांक खोलायेन म्हायती दितात. खंयच्या उपक्रमांत आयोजकांक कितें अपेक्षीत आसा, जाणकार कशे पद्दतीन ताची मोलावणी करतले हे विशीं विचारांचें दिवप घेवप जाता. परिक्रमा उपक्रम तीन वांट्यांनी वांटला. प्रोजेक्ट, प्री- फेस्ट आनी झिरो फेस्ट. प्रोजेक्टांत सोद निबंद, म्हायतीपट तयार करप अशे तरेचे उपक्रम जातात जातूंत वांगड्यांक प्रत्यक्ष सोदवावर करचो पडटा. प्री फेस्टांत ब्लॉग तयार करपा सारक्या उपक्रमा लागून थळाव्या वाठारांचे आयज ब्लॉग आमकां वाचूंक मेळटात. झिरो फेस्टांत प्रत्यक्ष मांडार आपली कला सादर करपाची संद उपलब्द जाता. 0.1 हातूंतल्यान परिक्रमान आपली सुरवात केल्ली तेन्ना सावन आतां मेरेन परिक्रमा रेपोझीटरींत भर पडत आसा. ताचेर फावो ते संस्कार करून बेगीनूच ते प्रकाशीत करपाची येवजण आसा.
झिरो फेस्ट जाले उपरांत 30 मे कलेक्टीव्ह ही कार्यावळ आयोजीत करतात. झिरो फेस्टांत जाल्ल्या वेंचीक सादरीकरणांक जाणकारांचें मार्गदर्शन दिवन तीं सादर जातात. हातूंत अनप्लग्ड, ट्रीयो ह्या उपक्रमांत आशिल्ल्या सादरीकरणांचो आसपाव जाता. ह्या भायर रावंड टेबल, परिक्रमा मॅगाझीन हेय दर वर्सा करपाचे तयारेंत संस्था आसा.
हेर उत्सवी महोत्सव आनी संमेलनां परस वेगळें व्यासपीठ परिक्रमा तरणाट्यांक दिवपाक सोदता. हातूंत वैचारीक, बुद्धीवादी आनी हस्तक्षेप करपी आयच्या काळा सारकें अपडेट रावपी व्यासपीठाची बुनयाद आमी घातल्या. विंगड विंगड क्षेत्रांनी तज्ञ जाल्ले वेवसायीक तशेंच आतांच अशा क्षेत्रांनी भितर सरपी तरणाटो हांचे एकामेकां कडेन संवाद घडोवन हाडप, फावो तशें तांकां मार्गदर्शन दिवप, फुडार घडोवपा खातीर तांकां आदार दिवप, शक्य आसा थंय तज्ञांच्या सांगातान वावर करपाची संद दिवप हें सगलें परिक्रमा राबयता. परिक्रमाच्या थींक टँकाचो विस्तार करप, नाविन्यपूर्ण गिन्यान निर्मिती करप हेंय ध्येय आसा.
उर्वशी नायक
95529 17041
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
