भांगरभूंय | प्रतिनिधी
भांगरभूंय । प्रतिनिधी
शिवोली : ओशेल हांगचो बांद खांवटे पडल्ल्यान व्हावंन वचपाचो प्रकार बिरेस्तारा सकाळीं जालो. श्री क्षेत्रपाल देवळा कडल्यान सुमार अर्द किलोमीटर अंतरार आशिल्ले मानशी कडलो बांद व्हांवंन गेलो. बुधवारा हो बांद व्हांवन वचपाचीं चिन्ना दिसपाक लागलीं. बिरेस्तारा सकाळीं चो व्हांवंन गेलो.
बांदाक खांवटे पडल्ल्यान पुराय़ शेताक धोको उप्रासला. बांदाचेर आशिल्ले माड आनी कवाथे मोडून पडल्यात अशें बांदार रावची गौरेश मांद्रेकारान सागलें. बांद सामको कमकुवत जाल्लो. दोन वर्सां आदी व्हो बांद सारको करपाची मागणी ओशेलचे पंचायत ग्रामसभेंत केल्ली. शेतकार बांदाची बारीक-सारीक कामां करताले. मात सरकारी यंत्रणेन आनी पंचायत मंडळान बांद सारको करपाचे मागणे कडेन आडनदर केल्ली अशें मांद्रेकारान सांगलें.
बांद सारको करपाची बेगोबेग उपाय येवजण केली ना जाल्यार बांदा कुशीक आशिल्ल्या शेतां उरत काय ना हें सांगपाक कुस्तार आसा. सध्या शेतकारांनी शेत जमनीन भाजीपालो- मिरसांगो हांची लागवड केल्या. शेंतांत उदक येवन ताचें लुकसाण जावपाची भिरांत आसा.
मजगतीं, आयज शुक्राराक बांदाची तात्पुरती दुरुस्ती करतले अशी म्हायती सरपंच प्रवीण कोचरेकारान दिली. बांदाची आमी पळोवणी केल्या. थळावी आमदार डिलायला लोबो हिका आमी म्हायती दिल्या. तिणे अजून कांय सूचोवणी केली ना. उदकाचो प्रवाहा प्रमाण काम सुरू करतले अशें सरपंचान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
