भांगरभूंय | प्रतिनिधी
बायलांचे संवसारीक टी-20 क्रिकेट सर्तीची पयली सेमी फायनल भारत आनी ऑस्ट्रेलिया ह्या पंगडां मदीं बिरेस्तारा केपटावनांत जातली. भारत सेगीत तिसरे खेपे सेमी फायनलींत सुवात मेळयली. हाचे पयलीं 2018 आनी 2020त लेगीत निमाण्या चारांनी सुवात मेळयिल्ली.
दोनूय पंगडांचेर नदर मारली जाल्यार ऑस्ट्रेलियेचें दालें जड दिसता. सध्याचो वस्ताद ऑस्ट्रेलिया पंगडान सदचे भशेन संवसारीक टी-20 सर्तींत बरें प्रदर्शन केलां. अंदूं सेगीत चार मॅची जिखून ताणें ए ग्रुपांतली पयली सुवात मेळयल्या. जाल्यार भारतान बी गटांत दुसरी सुवात मेळयल्या. ताणें चारांतल्यो तीन मॅची जिखल्यात.
आतां मेरेन सात संवसारीक टी-20 सर्ती जाल्यात. दक्षीण आफ्रिकेत चालू आशिल्ली ही आठवी सर्त आसा. ऑस्ट्रेलिया पंगडान सेगीत सवे खेपे फायनलींत सुवात मेळयल्या. जाल्यार पांच खेपे ताणें वस्तादपण जोडलां. 2016त कोलकाताच्या इडन गार्डन्सांत जाल्ले फायनलींत ताका वॅस्ट इंडिजा आड हार घेवची पडिल्ली. फाटले सर्तींत ताणें भारताक हारोवन वस्तादपण जोडिल्लें. ऑस्ट्रेलियेन सदांच भारता आड बरें प्रदर्शन केलां, ताका लागून फाल्यां जावपी मॅचींत लेगीत ऑस्ट्रेलियेचेंच दालें जड दिसता.
दोनूय पंगडां मदीं आतां मेरेन 30 मॅची जाल्यात. हातूंतल्यो 22 मॅची ऑस्ट्रेलियेन जाल्यार सात मॅची भारतान जिखल्यात. एके मॅचीचो निकाल लागूंक ना. संवसारीक टी-20 सर्तीच्या इतिहासांत दोनूय पंगडां मदीं आतां मेरेन पांच मॅची जाल्यात. हातूंतल्यो तीन मॅच ऑस्ट्रेलियेन जाल्यार दोन मॅची भारतान जिखल्यात.
मजगतीं, दुसरी सेमी फायनल फाल्यां दक्षीण आफ्रिका आनी इंग्लंड ह्या पंगडां मदीं जातली. दक्षीण आफ्रिकेन आपले निमाणे मॅचींत बांगलादेशाक 10 विकेटींनी हारयलो. बांगलादेशान दिल्ली 114 धांवड्यांची मोख दक्षीण आफ्रिकेन एकूय विकेट वगडायनासतना मेळयली. आफ्रिकेच्या जैतान न्युझिलॅण्डाचें सेमी फायनलींत सुवात मेळोवपाचें सपन भंगलें. ग्रूप एकांत न्युझिलॅण्ड चार गुणां सयत दुसरे सुवातेर आशिल्लो. आफ्रिकेक दुसरे सुवातेर पावपाक बांगलादेशा आड जैत गरजेचें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
