भांगरभूंय | प्रतिनिधी
पेडणें: अंदूंचो मोरजेंतलो अन्न आनी सांस्कृतीक महोत्सव येसस्वी जाल्ल्यान फुडल्या वर्सा मोरजेंतूच अन्न महोत्सव आयोजीत करपाची घोशणा पर्यटन मंत्री रोहन खंवटे हांणी अन्न महोत्सवाच्या समारोप सुवाळ्यांत केली.
तीन दीस चलिल्ल्या अन्न महोत्सव आनी सांस्कृतीक महोत्सवाच्या समारोप सत्रांत मुखेल सोयरे म्हूण पर्यटन मंत्री रोहन खंवटे, कला आनी सांस्कृतीक मंत्री गोविंद गावडे, नुस्तेमार मंत्री नीळकंठ हणर्ळकार, साळगांवचे आमदार केदार नायक, जिल्हो पंचायत वांगडी सतीश शेटगांवकार, अभिनेत्री हुमा कुरेशी बी मानेस्त हाजीर आशिल्ले.
खंवटे हांणी मुखार म्हणलें, मांद्रें मतदारसंघाचो पर्यटन विकासा खातीर सगले तरेचें मुख्यमंत्र्या सयत सहकार्य करतले अशें सांगलें.
हो महोत्सव ज्या वेळार मांद्रें मतदारसंघांत मनोवपाचें थारायलें त्या वेळार खूबशा लोकांक अजाप दिसलें. पूण मुख्यमंत्री डॉ. प्रमोद सावंत आनी आपणें घेतिल्लो निर्णय कितलो योग्य आशिल्लो हें आमदार जीत आरोलकार हांणी येसस्वी करून दाखयलें अशें खंवटे हांणी म्हणलें.
स म्हयन्यां भितर
रवींद्र भवनाचें भुंयपुजन
पेडणें ही कलाकारांची भूंय आसा आनी त्या कलाकारांक हक्काची माची मेळोवन दिवपा खातीर रोखडेंच मांदऱ्यां रवींद्र भवन उबारतले. आमदार जीत आरोलकार हांणी जी सुवात दाखयल्या ते सुवातेंत रवींद्र भवनाची बुन्याद घालतले अशें कला आनी संस्कृती मंत्री गोविंद गावडे हांणी सांगलें.
ह्या वेळार मंत्री नीळकंठळ हणर्ळकार, आमदार जीत आरोलकार हांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
