भांगरभूंय | प्रतिनिधी
गोंयांत (अस्तंत बंगाल, केरळांतूय) खूब पयलीं सावन फुटबाॅल खेळटात. हांगाचे मातयेंत फुटबाॅल रिगला. लोकांच्या शिरंतरांनी फुटबाॅल व्हांवता. मात, हालींच्या कांय वर्सांनी थोड्या सर्तींनी आमी फाटीं पडपाक लागल्यात. तातूंतली एक नामनेची सर्त म्हणल्यार संतोष ट्राॅफी. हे सर्तींत गोंयची कामगिरी वर्सांन वर्स सकयल्या पांवड्याचेर पावत आसा. ज्या राज्यांनी हालींच फुटबाॅलाचें बीं रोयलां, तांणीय गोंयां सारक्या अणभवी राज्याक कांय न्हय करून सगल्याच मॅचींनी हारयलें, ही फुटबाॅल मोग्यां खातीर दुखदिणी गजाल. खेळां खात्यान आतां हातूंत लक्ष घालपाचें थारायलां. पंगड उणोच स म्हयने पयलीं वेंचून काडटले, अशें खेळां मंत्री गोविंद गावडे हांणी सांगलां. आतां गोंयच्या फुटबाॅलाक आदले दीस केन्ना येतात, ताची वाट पळोवपाची.
संतोष ट्राॅफी सुरू जाली 1941 वर्सा. भारतीय फुटबाॅल संघटनेचे अध्यक्ष सर मन्मथनाथ राॅय चौधरी (बंगालांतल्या संतोष संस्थानाचे महाराज) हांच्या नांवान ती सुरू केल्ली. मागीर अ. भा. फुटबाॅल संघटनेन ती मुखार चालू दवरली. ड्युरांड कप, रोव्हर्स कप आनी आयएफए शिल्ड ह्योय सर्तीं लोकप्रीय आसात. गोंयान संतोष ट्राॅफी 5 फावटी जिखल्या, तर 8 फावटी उपजैतिवंत थारलां. पयले खेप 1982 तर निमणे खेप 2008 त. अस्तंत बंगाल 32 खेप जैतिवंत थारला. 14 फावटी उपजैतिवंत. खंयचीय सर्त जिखतलो जाल्यार खेळगड्यांनी (अणभवी आनी अणभव नाशिल्लेय) उणेच दोन म्हयने तरी एकठांय खेळपाक जाय. गोंय फुटबाॅल असोसिएशनाचे अध्यक्ष कायतान फर्नांडीस हांच्या मता प्रमाण, ‘तांणी खेळगड्यांचो जेवणाचो भत्तो वाडयल्लो, निमणे फेरयेक पावल्यार 3 लाखांचो बोनस दिवपाचेंय थारायल्लें. हेर राज्यांनी तरणाट्या खेळगड्यां खातीर साबार प्रशिक्षण शिबिरां जातात. गोंयांतूय तीं जावपाक जाय. सर्तींचो आंकडोय वाडपाक जाय.’ जीएफ अध्यक्षांची मागणी पूर्ण कोणे करपाची? खेळां खातें आनी जीएफएन एकठांय बसून हाचेर मार्ग काडपाची गरज आसा.
कांय आदले खेळगडे, कोचांच्या मतान, संतोष ट्राॅफीची तारीख जाहीर जाता, तेन्ना जीएफए कोच सोदता. मागीर जाचो सिनीयर, ज्युनियर खेळगड्यां कडेन चड संबंदूच येवंक ना. तांकां कोच करता. (शालेय, विद्यापीठ पांवड्या वयले कांय खेळांचे पंगड राज्या भायर वतात. तेन्ना कोच, वेवस्थापक अक्षरशा धरून हाडचे पडटात. हो खेळगड्यांचो अणभव) फुटबाॅलाचे राष्ट्रीय सर्ती खातीर जर अशे तरेन कोच वेंचून काडटात जाल्यार गोंयच्या फुटबाॅलाचो फुडार काळखी म्हणचो पडटलो. फुटबाॅल हो गोंयचो राज्य खेळ, हें कोणे विसरूंक फावना. खेळा मंत्र्यान पयर कांय लोक फक्त पदां खातीर असोसिएशनाचेर आयल्यात, असो आरोप केलो. फक्त गोंयूच न्हय, तर देश पांवड्याचेर हें चल्लां. संघटनांनी राजकारण घुशिल्ल्यान खेळाचेर परिणाम जाला, अशेंय तांणी सांगलें. मागीर हें राजकारण भायर उडोवन खेळां संघटना नितळ करपाचें काम जावंक जाय. गोंयां पसून ताची सुरवात जावची.
देशाच्या राष्ट्रीय क्रिकेट पंगडांत खेळपी खेळगडे रणजी, दुलीप ट्राॅफी खेळपाक तयार नासतात. (अर्थांत आंतरराष्ट्रीय मॅचीय वाडल्यात.) भायले दौरे आसले तरी सुशेग घेवपाचें कारण ते मुखार करतात. तांकां रणजी खेळपाची सक्तीय केल्ली, पूण कांय फायदो जावंक ना. फुटबाॅलांतूय आतां कांयशें तशेंच जावपाक लागलां. आय लीग आनी आयएसएलांतल्या खेळगड्यांक अ. भा. फुटबाॅल संघटना आपल्या राज्या खातीर खेळपाची परवानगी दिना खंय. गोंयचे उदाहरण घेवचें जाल्यार ह्या दोन सर्तीनी खेळपी उणेच 25 खांपे खेळगडे आसात. ते नाशिल्ल्यान आमचो पंगड घडये दुबळो जाला आसतलो. खेळा खात्यान हो नेम बदलपाक पावलां उबारूंक फावो. दुसरी गजाल, परवानगी मेळ्ळी जाल्यार ह्या खेळगड्यांनी राज्या खातीर खेळपाक जाय. तशे ते खेळटले व्हय? कांय पंगडूय राष्ट्रीय पांवड्या वयल्या लीग मॅचींनी खेळपी आपल्या खेळगड्यांक संतोष ट्राॅफी खेळपाक दिनात, अशेंय कांयजाण सांगतात. आतां शाळा, म्हाविद्यालयांच्या सर्तींनी खेळपी तरणाट्यांचेर लक्ष केंद्रीत करचें पडटलें. 14 वर्सां परस ल्हान खेळगड्यांचेरुय मेहनत घेवपाक जाय. आंतर शालेय, खाजगी क्लबांच्या सर्तींनी वाड जाली, जीएफएन, गोंय सरकाराच्या खेळां खातें, प्राधिकरणांनी शाळांनी प्रशिक्षण शिबिरां घेतलीं जाल्यार गोंयचो फुटबाॅल परतून एकदां कूस परतूं शकता. ते खातीर शाळेक पाचवेंचार मैदान मेळटलें, हाचीय खबरदारी घेवची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
