भांगरभूंय | प्रतिनिधी
भांगरभूंय I प्रतिनिधी
पणजीः फुडले कांय दीस राज्यांतलें तापमान स्थीर उरतलें. आर्द्रतेत वाड सुरू जाल्ल्यान फुडले कांय दीस राज्यांत फातोड्डेच्या वेळार धुके आनी दंव पडटलो, अशी म्हायती हवामान विभागाचे शास्त्रज्ञ राहुल एम. हांणी दिली.
फाटल्या कांय दिसांनी राजधानी पणजेतल्या कमाल तापमानान उच्चांक गांठिल्लो. पूण साेमारा कमाल तापमान 34.4 अंश डिग्री सेल्सियस आशिल्ले. पणजे 13 फेब्रुवारी दिसा 37.9 अंश डिग्री सेल्सियस तापमानाची नोंद जाल्ली. फाटल्या 39 वर्सांतलें फक्त फेब्रुवारी म्हयन्यांतलें हें सगल्यांत तिसऱ्या क्रमांकाचें तापामान थारिल्लें. ते उपरांत 16 फेब्रुवारी दिसा फाटल्या 10 वर्सांतले सगल्यांत चड दुसऱ्या क्रमांकाचे (38.2 अंश डिग्री सेल्सियस) उच्चांकी कमाल तापमानाची पणजे नोंद जाल्ली.
डिसेंबर, जानेवारी अशें सेगीत दोन म्हयने शिंयाचो अणभव घेतले उपरांत फेब्रुवारीच्या सुरवाती पसुनूच गोंयकारांक गरमी सोंसची पडिल्ली. बदलिल्ल्या हवामानाक लागून गर्दी, जोर, खोकली अशा दुयेंसांनी सतायिल्ले. तातूंत गरमी कायम उरिल्ल्यान भिरांतीचे वातावरण पातळपाक लागिल्ले. आतां फुडले कांय दीस राज्यांतले कमाल तापमान 34 ते 35 अंश डिग्री सेल्सियस स्थीर उरतले, अशें राहुल एम. हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
