भांगरभूंय | प्रतिनिधी
लोकांक हुस्को; ताकतिकेन बंदोबस्त करपाची मागणी
भांगरभूंय । प्रतिनिधी
वाळपयः नगरगांव पंचायतींतल्या धावे वाठारांत काजूचे बागायतींत बिबट्याचो वावर नदरेक पडला. ताका लागून लोकां मदीं हुस्को वाडला.
सध्या काजूचो मोसम सुरू जाला. बिबट्याच्या वावराक लागून काजू बागायतींत वचपा खातीर लोक भिवपाक लागल्यात. त्या बिबट्याचो बेगिनात बेगीन बंदोबस्त करचो अशी मागणी थळाव्या लोकांनी केल्या.
धावे गांवांतल्या तार मार्गा वयले काजू बागायत वाठारांत 20 फेब्रुवारीक रेडून मरून पडिल्लें लोकांक दिसलें. काजू पिकाचो मोसम सुरू जाल्ल्यान कांय लोक काजींनी भोंवताले. तेन्ना तांकां हो प्रकार दिसलो.
मरून पडिल्ल्या रेडकाचें पोट फोडून भितरलें मांस वेगळे करून अर्दवट खाल्ले स्थितींत उडयिल्लें. हो हल्लो बिबट्यानूच केल्लो आसपाक जाय, असो मुळावो अदमास थळाव्या लोकांनी काडला. गांवांतल्या पाळीव जनावरांचेर रानवटी जनावरांचे हल्ले वाडल्यात. सत्तरींतले चडशे लोक आपलीं गोरवां चरपा खातीर माळरानाचेर सोडटात. अशा वेळार हे हल्ले जातात. धावे गांवांत असोच प्रकार मुखार आयला. सकाळ सांजे वेळार लोकांची काजू बागायतींतल्यो फावटी वाडल्यात. हे खातीर बिबट्याचो भंय तांकां सतावपाक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
