भांगरभूंय | प्रतिनिधी
1 जानेवारी ते काल मेरेन 46 जाणांक मरण
वास्को: कुठ्ठाळे नव्या जुवारी पुलार काल (आयतारा) सकाळीं जाल्ल्या अपघातांत दुचाकी चालक रोझारियो झेवियर डिसोझा (61) हांकां मरण आयलें. जाल्यार तांची घरकान्न क्रिस्टिना डिसोझा (53) गंभीर जखमी जाल्ल्यान उपचारा खातीर गोंय वैजकी हॉस्पिटलांत दाखल केल्या. गतीन आनी निश्काळजीपणान मोटार चलोवन डिसोझा हांच्या मरणाक कारण थारिल्लो मोटार चालक कुणाल राजेशकुमार वर्मा (29, नवी दिल्ली) हाचे आड गुन्यांव दाखल केला.
बाणावले रावपी रोझारियो डिसोझा आनी तांची घरकान्न क्रिस्टिना आयतारा सकाळीं पणजे वतालीं. ते दुचाकीन कुठ्ठाळे सावन नव्या जुवारी पुलार पावले उपरांत गतीन येवपी रेन्ट अ कार ची दुचाकीक खर धपको बसलो. ताका लागून रोझारियो आनी क्रिस्टिना दुचाकी सयत रस्त्यार पडलीं. तांकां गंभीर स्वरुपाच्यो जखमो जाल्ल्यान तांकां उपचारा खातीर हॉस्पिटलांत व्हेले.
मजगतीं, रोझोरियो हांकां दोतोरांनी मरण आयिल्ल्याचें जाहीर केलें. क्रिस्टिना हांचेर उपचार सुरू आसात. ह्या अपघातांत दुचाकी आनी मोटारीचें कांय प्रमाणांत लुकसाण जालां.
ह्या प्रकरणांत वेर्णें पुलीस स्टेशनाचे उपनिरिक्षक संकेत तळकार फुडलो तपास करतात.
मजगतीं, गोंयांत 1 जानेवारी सावन ते आयज मेरेनच्या 50 दिसांत 46 जाणांक अपघातांत मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
