भांगरभूंय | प्रतिनिधी
मे ष, वृषभ आनी कुंभ ह्यो तीन राशी
(शनी- सूर्य आनी कुंभांत) 30
वर्सांनी महाशिवरात्रेक एकठांय
येतात. हो दुग्दशर्करा योग असो मानतात. 18 फेब्रुवारीक असो योग आयिल्ल्यान अंदूंची महाशिवरात्र विशेश थारतली. ते निमतान जगद््गुरू रामानंदाचार्य श्री स्वामी जगद््गुरू नरेंद्रचार्यजी महाराज दक्षीण पीठ नाणीजधाम उपपीठ पोरणें गोंयच्या शिवमंदिरांत 18 फेब्रुवारीक भरगच्च कार्यावळी आयोजीत केल्यात.
भोलेनाथ आनी देवी पार्वतीचें लग्न म्हणल्यारूच महाशिवरात्र माघ म्हयन्यांतल्या कृष्ण पक्ष चतुर्दस तिथीक मनयतात. ह्या दिसा देशभर महाशिवरात्र उत्सव जाता. अंदूं महाशिवरात्र 18 फेब्रुवारी दिसा आसा. जो कोण ह्या दिसा पुराय भक्तीभावान शिवशंभूची पुजा करता ताका बरो जिणे-सांगाती मेळटा तशेंच धन, संपत्ती आनी भलायके विशींच्यो ताच्यो सगल्यो समस्या पयस जातात अशें मानतात.
महाशिवरात्रेक 30 वर्सांनी हो दुर्मीळ योगायोग आयला. ज्योतिष तज्ञांच्या मतान महाशिवरात्रेक 30 वर्सां उपरांत शनी आनी ताचो बापूय सूर्य दोगूय कुंभ राशींत एकठांय आसतले. शनी आनी सूर्य हांच्या संयोगाक लागून अनेक राशींचेर ताचो प्रभाव दिसून येतलो. दुसरे वटेन शारिरीक सूख आनी सौंदर्याचो कारक शुक्र, मीन राशींत विराजमान जातलो. कैलास निवासी भगवान शंकराची पुजा केल्ल्यान ग्रहांचे त्रास पयस जातात. जांचे कुंडलींत शनी आनी सूर्य हांच्या संयोगाक लागून अशुभ गजाली घडपाची शक्यताय आसता तांणी ह्या दिसा भोलेनाथाचेर रुद्राभिशेक करचो. जाका लागून ताचे सगले दोश पयस जातात अशें मानतात. अंदूंची महाशिवरात्र खूब विशेश अशी मानतात. ज्योतिष शास्त्रा प्रमाण 30 वर्सां उपरांत महाशिवरात्रेक असो दुर्मीळ संयोग घडटा. ह्या दिसा शिवाची पुजा केल्यार बरें फळ मेळटलें.
महादेवाची म्हयमा अनन्यसादारण आसा. ताची भक्ती करतल्या देवींक, देवांक, मनशांक, गंधर्वांक, दानवांक आनी भूत-पिशाच्चांक ताचो आशिर्वाद लाबता. महाशिवरात्रेच्या दिसा ज्या शिवलिंगाची खूब तेंप पुजा करूंक ना अश्या खंयच्याय शिवलिंगाचेर दुदाचो अभिशेक करचो. अशें केल्ल्यान पितृदोश, गृहदोश अशे सगलेच दोश पयस जातात अशें मानतात. मजगतीं, पंचाक्षरी मंत्राचो 108 वेळा जप करचो. ह्या दिसा निशिता काळांतल्या शिवलिंगाची पुजा खूब लाव दिता अशें मानतात.
भाग्याचो मेळटलो सांगात
मेष ः ह्या राशीच्या लोकांक भाग्याचो सांगात मेळटलो. कुंभ राशींतल्या तिनूय ग्रहांचो संयोग मेष राशीच्या लोकांक विशेश लाव करून दितलो. कारण हे राशींत तिनूय ग्रह 11 व्या भावांत एकठांय आयल्यात. अशे परिस्थितींत सांगात मेळिल्ल्यान हे राशीच्या लोकां खातीर येणावळीचीं नवीं साधनां उक्तीं जातलीं. कितल्याश्याच दिसां सावन तशींच पडून आशिल्लींव कामां परत सुरू जातलीं .
विशेश लावाचे योग
वृषभ ः हे राशीच्या लोकांक विशेश लावाचे योग मेळटले. तिग्रही योग हे राशीच्या लोकांक विशेश लाव दितले. सूर्य, चंद्र आनी शनी हांच्या संयोगान हे राशीच्या लोकांक अर्थीक लावा वांगडाच दरेका मळार येस मेळटलें. ताचे वांगडाच नोकरी आनी वेवसायांतूय फायदो जातलो.
अचकीत जातलो धनलाभ
मकर ः मकर राशीच्या लोकांक अचकीत धनलाभ जातलो. हे राशींत सूर्य, चंद्र आनी शनी हांच्या संयोगान तयार जाल्ल्या दुसऱ्या घरांत तिग्रही योग तयार जाता. हें घर वाणी आनी धनाचें स्थान मानतात. अशे स्थितींत मकर राशीच्या लोकांक अचकीत धनलाभ जावंक शकता. समाजांत मान-सन्मान मेळटलो. तुमच्या उलोवण्याक लागून कितल्याश्याच कामांनी तुमकां येस मेळटलें.
नवे नोकरेची संद
कुंभ ः त्रिग्रही योग कुंभ राशीच्या लोकां खातीर लावाचो मानतात. अशे स्थितींत हे राशीच्या लोकांची दरेक इत्सा पूर्ण जातली. येणावळीचें नवें साधन उक्तें जाल्ल्यान नवे नोकरेचो सोद पूर्ण जातलो. तशेंच भलायकीय बरी उरतली.
शंकराक धवींच फुलां कित्याक आवडटात ?
शिवाचो आवडटो रंग धवो. ताका लागून ताचे पुजेंत धवें फूल अर्पण करतात. महादेवाक शक्यतो धवीं वा निळीं फुलां ओंपतात. देखीक मोगरीं, पारजत, ओंवळां, धवें आनी निळें साळीक, गोकर्ण,अनंत, धोत्रा. धवीं फुलां उपासना म्हणून वापरतात. दरेका देवाक कितें आवडटा हें आमच्या पुर्वजांनी थारायलां. त्या प्रमाण महादेवाक धवें फूल आवडटा आनी त्रिशुळा सारकीं तीन पानां आशिल्लो बेलूय आवडटा. देवाक फकत भक्तीभाव लागता. महादेवाक धवीं फुलां प्रीय आसात. कारण धवो रंग हो मनाक शांतिकाय दिता.
भरत तळणकार, वास्को
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
