भांगरभूंय | प्रतिनिधी
कळंगूट पुलिसांनी केली चवगांक अटक
भागरभूंय । प्रतिनिधी
म्हापशें: नागवें- हडफडें रस्त्याचे कुशीक पार्क केल्ले पर्यटक प्रवासी बशीच्या कॅबिनांत चडून चालकाचो मोबायल फोन आनी पयशे चोरपी चार जाणांचे टोळयेक कळंगूट पुलिसांनी धरले. हे चोरयेची सीसीटीव्ही फुटेज मेळ्ळे उपरांत 24 वरां भितर पुलिसांनी कारवाय केली.
अटक केल्ल्या दुबावितां मदीं सोर्सलीन मोल्ला, राजू मोल्ला, आरिफूल मोंडल आनी बाप्पा मोल्ला (रा. काणका- वेर्लें, मूळ पश्चीम बंगाल) हांचो आस्पाव आसा. ही चोरी हणजूणें पुलीस स्टेशनाचे हद्दींत घडिल्ली.
ही चोरी बिरेस्तारा फांतोडेर जाल्ली. मंगळूर सावन केए 19 एए 6388 ही प्रवासी बस पर्यटकांक घेवन आयिल्ली. बागा दर्यादेग वाठारांतल्या एका रिसॉर्टांत प्रवाशांक देंवोवन ती नागव्यां रस्त्याचे कुशीक पार्क केल्ली. राती वेळार बशींत चालक आनी वाहक न्हिदील्ले. तांणी आपलें सामान कॅबिनांतूच दवरिल्लें. मध्यानरातीर देड वराच्या सुमाराक अज्ञात चोर बशींत चडले आनी चोरी केली, हो प्रकार बशीच्या कॅबिनांत लायिल्ल्या सीसीटीव्ही फुटेजांत चित्रींत जालो.
सकाळीं उठले उपरांत चालक आनी वाहकाक चोरयेचो प्रकार लक्षांत आयलो. तांणी ह्या प्रकरणांत पुलीस स्टेशनाचेर कागाळ केली आनी सीसीटीव्ही फुटेज दिली. ते फुटेजीच्या आदारान कळंगूट पुलिसांनी तपास मोहीम हातांत घेवन दुबावितांक ताब्यांत घेवन अटक केली.
दुबावितांनी चोरयेची कबुली दिली. तशेंच चोरिल्लो फोन विकिल्ल्याचें सांगलें. मोबायला सयत चोरयेचें सगळें सामान जप्त करचे खातीर पुलीस चवकशी करतात. पुलीस निरिक्षक दत्तगुरू सावंत हांच्या मार्गदर्शना खाला हवालदार विद्यानंद आमोणकार, कॉन्स्टेबल विजय नायक, गणपत तिळोजी, अमीर गरड, भगवान पालयेंकार आनी प्रितेश किनळेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
