भांगरभूंय | प्रतिनिधी
गुंगी दिवन घेतलो ताब्यांत; दुचाकीचें लुकसाण
भांगरभूंय । प्रतिनिधी
वाळपयः भिरोड्यां एका रेड्यान बायलेचेर हल्लो करून तिका जखमी केली. 16 फेब्रुवारीक रान खातें, पशुवैजकी खातें, पंचायत आनी थळाव्या लोकांनी सुरू केल्ले मोहिमेंत दनपारां 3 वरांचेर त्या रेड्याक ताब्यांत घेतलो.
मेळिल्ले म्हायती प्रमाण भिरोंडें वाठारांत फाटल्या दोन दिसां सावन एका रेड्यान खूब धुमाकूळ घातला. बुधवारा सांजे वेळार त्या रेड्यान एके बायलेचेर हल्लो केलो. ते जखमी बायलेचेर वाळपयच्या सरकारी समाजीक हॉस्पिटलांत उपचार चालू आसात. मेळिल्ले म्हायती प्रमाण विजेचें बील दिवपा खातीर गेल्ल्या मिटर रिडराचे दुचाकीचेर हल्लो करून त्या रेड्यान तिचें व्हड प्रमाणांत लुकसाण केलें. ताका आडावपा खातीर गेल्ल्या लोकांचेरूय ताणें हल्लो करपाचो यत्न केलो. हे विशींची म्हायती मेळटाच सरपंच उदयसिंह राणे ताकतिकेन घडणुकेचे सुवातेचेर पावले. वाळपय उजो पालोवपी दळाचे यंत्रणेक थंय आपयली. मात त्या रेड्याचो अतिरेक पळोवन उजो पालोवपी दळाचे जवानूय ताका ताब्यांत घेवपाक अपेशी थारले. उपरांत रान खात्याचे अधिकारी आयले, तांकांय ताका ताब्यांत घेवपाक जालें ना. अखेर त्या रेड्याक ताब्यांत घेवचे खातीर पशुवैजकी अधिकाऱ्यांक आपयले. तांणी ताका गुंगेचें इंजेक्शन मारलें आनी ताका ताब्यांत घेतलो. सध्या ताका थंयच बांदून दवरला, पूण ताचो बंदोबस्त करचो, अशी थळाव्या लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
