भांगरभूंय | प्रतिनिधी
ना र्वें गांव दिवचल तालुक्यांत आस्पावता. शेतां- भाटांनी, कुळागारांनी, माड– माडयांनी भरिल्लो असो म्हजो गांव. नार्वें गांवांत जायतीं देवळां आसात. ताका लागून ह्या गावाक देव- स्थळ अशें लेगीत म्हणटात. नार्वें गांव इतिहासकालीन. हांगसर आशिल्ल्या श्री सप्तकोटेश्वर देवळाक लागून तो चड फामाद जावंक पावला. दिवाडे लेगीत नार्वें गांव आसा. ती श्री सप्तकोटेश्वर देवळाची पयलीं सुवात आशिल्ल्याचें पुरावे आमकां मेळटात.
ज्या गांवांत हांव रावता ताका नवें नार्वें म्हूण पाचारतात. “हिंदळे” हें गांवांचें पयलींचें नांव. तशें पळोवंक गेल्यार ह्या गांवची संस्कृताय लेगीत व्हड आसा. वेग- वेगळ्यो सण- परबो हांगासर मनयतात. ह्या गांवची ग्रामदेवता श्री शांतादुर्गा. त्याच बरोबर श्री मसणदेवीची जात्रा, जी भुतांची जात्रा म्हूण फामाद आसा, तिका लागून ह्या गांवांक वेगळी वळख मेळ्ळ्या. नार्वेंची अष्टम तीर्थ-स्थळार जाता. 12 वर्सांनी एकदा जावपी श्री कोको देवाची जात्रा आनी दसऱ्याक जावपी णव तरंगा ह्याच गावांत पळोवपाक मेळटात. ह्या गांवांत श्रीलक्ष्मी नारायण हें गुजरात्यांचें देवूळ आसा. अशें जायतें इतिहास कालीन घडणुको हांगसर अणभवपा आनी शिकपा सारक्यो आसात.
हांव जेन्ना तिसरें वर्स कला शिक्षण वर्गांत शिकतालें तेन्ना हांवे म्हज्या गांवांचेर ल्हानसो प्रकल्प तयार केल्लो, तो म्हळ्यार “दिवचल म्हालांतल्या नार्वें गांवचो समाजीक इतिहास”, जेन्ना हो सोद वावर वा प्रकल्प म्हूण जेन्ना हांवे हातांत घेतलो तेन्ना ज्यो थोडें भोव गजाली म्हाका खबर नाशिल्ल्यो, त्यो हांवें ह्या प्रकल्पांतल्यान सोदून काडल्यो आनी अदीक म्हायती मेळयली. हो प्रकल्प करपाक म्हज्यांत एक वेगळीच खोस, उत्सुकताय निर्माण जाल्ली. स्वता हांवें म्हज्या गांवा बद्दल अदीक जाणून घेवप आनी ती म्हायती लोकां मुखार दवरप हें एक व्हड येस. हो प्रकल्प करपाक डॉ.. भूषण भावे म्हजो प्रकल्प मार्गदर्शक हांचो म्हाका हातभार लागलो म्हूण तांचेय आभार मानतां. हेर जाणांनी म्हाका म्हायती दिली. प्रत्यक्षांत भेट घेवन हो म्हजो प्रकल्प “दिवचल म्हालांतल्या नार्वें गांवचो समाजीक इतिहास” पूर्ण जालो. ह्या प्रकल्पांतल्यान हांव खूब शिकलें. त्याच बरोबर सांगपाक खूब खोस भोगता, 350 वर्सां पयलीचें श्री सप्तकोटेश्वर देवूळ, जे छत्रपती शिवाजी महाराजांनी नार्वें गांवांत बांदून घेतिल्लें ताचो जीर्णोद्धार हालींच 11 फेब्रुवारी दिसा व्हडा दबाज्यान जालो. फेब्रुवारीचें 9, 10 आनी 11 ह्या तारखेर साबार कार्यावळी जाल्यो. गोंय पुरात्तव खात्याच्या खाला ही पुराय कार्यावळ बरें तरेन जाली.
ह्या सुवाळ्याक मोटे संख्येन भाविकांनी खेट केली. महाराष्ट्रांतल्यान आयिल्ल्या भाविकांच्या तोंडार सुमारा भायली खोस दिसताली. देवूळ जे पद्दतीन छत्रपती शिवाजी महाराजांनी बांदिल्ले तशाक तसो देवळाचो जीर्णोध्दार केला. श्री सप्तकोटेश्वर देवाचें देवूळ दर एकल्याचें मन भुलयता. दिव्य आनी भव्य अशें देवूळ म्हज्या गांवांत आसा म्हूण बरें दिसता. तर दुसरें वटेन खोशयेक शिम मेर उरना कारण गोमट्या अशा ह्या गांवांतले भांगराळे भुमीक साक्षात छत्रपती शिवाजी महाराजांचे पांय लागल्यात, हें आमचें भाग्य. सध्याक हें देवूळ लोकांचे आकर्शण थारलां. ।। छत्रपती शिवाजी महाराज की जय।। सप्तकोटेश्वर महाराज की जय.
प्राजक्ता प्रेमानंद गांवकार
विद्या प्रबोधिनी महाविद्यालय, पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
