भांगरभूंय | प्रतिनिधी
भांगरभूंय । खेळां प्रतिनिधी
पणजीः प्ले ऑफ फेरये खातीर खडेगांव दावेदार आशिल्लो एफसी गोंय, आयएसएलच्या अंदूच्या सिझनांतली निमाणी मॅच आयज (बिरेस्तार) फातोड्ड्या चेन्नय एसीसी आड खेळटलो. घरच्या मैदानार हॅप्पी एंडिग करपाचें तांचें लक्ष्य आसतलें. आदलो वस्ताद एफसी गोंय खातीर 2022-23 आयएसएल सिझनांत तांचें घरचें मैदान लकी थारलां. फातोड्ड्या 9तल्यो 6 मॅचींत तांणी प्रतिस्पर्थ्यांचेर वर्चस्व दवोरला. निमणी मॅच वर्चस्व कायम दवोरपाक तांकां फायद्याची थारपाक शकता.
चेन्नय एफसी पयलींच प्ले ऑफचे रेसींतल्यान भायर पडला. मात थॉमस ब्रडारिकचो व्हो पंगड सहज हार माननास्ता धपको तंत्रान ते कमाल दाखोवपाक शकतात. आयचे मॅचींत मरिना मचान्स हाका वोगडावपा सारकें कांय ना. ताका लागून कार्लोस पेना आनी तांच्या वागंड्यांक सादूर रावन खेळचें पडटलें. आमी प्ले ऑफ खातीर पात्र थारपाचे आमचे तांकीर आमचो विस्वास आसा अशें एफसी गोंयचो मुख्य प्रशिक्षण कार्लोस हाणे सांगलें. लीग फेरयेंतले निमणे मॅचींत नक्की किदें करप हें आमकां खबर आसा. तीन गोल करून फॉर्मांत आशिल्ल्या मुंबय सिटी एफसी आड एफसी गोंयांक हार खावची पडली तरी सगल्यांत चड गोलांची ही लडत एकतर्फी नाशिल्ली. फाटले निकाल फाटीं दवोरून आतां सकारात्मक खेळ करपाचो आमचो विचार आसा अशें कार्लोसान सांगलें.
मुंबय सिटी, हैदराबाद एफसी प्ले ऑफ फेरये खातीर थेट पात्र थारल्यात. बाकीच्या दोन सुवातां खातीर पांच क्लब सर्तींत आसात. तातूंत केरळ ब्लास्टर्स, एटीके मोहन बगान, बंगळुरू एफसी आनी ओडिशा एफसी तशेंच एफसी गोंचचो आसपाव आसा. गोंयचे सगले मुखेल खेळगडे फीट आसात हे खातीर पेना हांणी खोस उक्तायल्या. जैता खातीर बिरेस्तारा सगल्यांत बरे इलेव्हनाक मैदानार देंवोवपाचो आमचो यत्न आसतलो अशें तांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
