भांगरभूंय | प्रतिनिधी
भांगरभूंय । प्रतिनिधी
वास्कोः गोंयचें नामनेतें विंडसर्फर कात्या कुएलोन मुंबय जाल्ल्या आशियाई खेळांत विंडसर्फींगांत भांगरा पदक मेळयलें. हाका लागून सेगीत दुसरे फावट आशियाई विंडसर्फींग सर्ती खातीर पात्र जावपी तें गोंयांतलें पयलें चली थारलां. तागेलो भाव ड्वेन कुएलोन तागेल्या गटांत रुप्या पदक मेळयलें. बापूय डोनाल्ड कुएलो व्होच तांकां प्रशिक्षण दिवपाचें काम करता.
आशियाई विंडसर्फींग सर्त येता त्या सप्टेंबर म्हयन्यांत चीनांत जातली. तातूंत भारताचें प्रतिनिधीत्व करपी कात्या हें एकलेंच चली आसतलें. मुंबय जाल्ल्या आशियाई विंडसर्फींक चांचणी सर्तींत भांगरापदक मेळोवन हो म्हजे खातीर खोशयेचो खीण आशिल्लो. विशेश म्हणल्यार हें सर्तींतल्यान सेलिंग विशीं म्हाका खूब कितें शिकपाक मेऴ्ऴें. 20 नॉटांचे स्पिडीन आमकां सेलिंग करचें पडले. म्हजे खातीर तें एक आव्हान आशिल्लें अशें कात्यान मुंबयच्यान दाबोळी विमानतळार आयल्या उपरांत प्रसार माध्यमांक सांगलें.
मुंबय जे सुवातेर ही चांचणी सर्त आयोजीत केल्ली थंय उदकांत कोयर आशिल्लो. ताका लागून ती सर्ती खातीर बरी सुवात नाशिल्ली अशें ड्वेन कुएलोन सांगलें. 2022 वर्सा जाल्ली आशियाई चांचणी सर्तींत हांवें जिखल्ली. मात कोविडाक लागून आशियाई सर्त जावपाक शकली ना. अंदूचे सर्ती खातीर परत चांचणी घेवची पडली. दोन दिसां पयलीं म्हाका डेंग्यु जाल्ल्यान म्हाका सराव करपाक वेळ मेळ्ळो ना. मात हांवें कशेंय करून रुप्या पदक मेळयलें अशें ताणे सांगलें. गोंय सरकारा कडल्यान मेळपाचे रोख रक्कमेचे पुरस्कार 2011 सावन आपल्याक अजून मेळ्ळे नात अशी म्हायती ताणे दिली.
गोंय सरकारान विंडसर्फींगाक उर्बां दिवपाक फुडें सरपाक जाय अशें मत कात्याचो बापूय डोनाल्ड कुएलोन उक्तायलें. गोंयांत व्हडली दर्या देग आसा. नव्या विंडसर्फरांक प्रशिक्षण दिवपा खातीर तिचो उपेग करपाक जाय अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
