भांगरभूंय | प्रतिनिधी
भांगरभूंय । खेळां प्रतिनिधी
पणजीः ह्या वर्साच्या आक्टोबर ना जाल्यार नोव्हेंबर म्हयन्यांत गोंयांत राष्ट्रीय खेळाचें आयोजन जातलें अशी म्हायती खेळां मंत्री गोविंद गावडे हांणी गोंय ऑलिम्पिक असोसिएशनाच्या शिश्टमंडळाक दिली. सरचिटणीस गुरुदास भक्ता हाच्या फुडारपणा खाला ह्या शिश्टमंडळाक गावडे हांणे बुधवारा 37व्या राष्ट्रीय खेळा संबंदी चर्चा करपाक आपयल्लें.
राष्ट्रीय खेळा मजगतीं अॅथेलिटांक जाय तो सगळो तेंको दिवपाक गोंय सरकार बांदील आसा. खेळा खातीर जाय आशिल्ली ती सगली साधन- सामग्री वेळार उपलब्द करून दिवपाचें उतर गावडे हांणी शिश्टमंडळाक दिलां. ऑक्टोबर ना जाल्यार नोव्हेबर म्हयन्यांत खेळांचें आयोजन करून दिवाळे पयली ताचो समारोप करपाचो विचार आसा. खेळाची निश्चीत तारीख भारतीय ऑलिम्पिक असोसिएशन (आयओसी) आनी केंद्र सरकारा कडेन चर्चा करून जाहीर करतले. आयओसीच्या शिश्टमंडळाक गोंयांतले तयारेची पळोवणी करपाक 6 मार्चाक गोंयांत येवपाचें आमंत्रण दिलां अशेंय गावडे हांणी सांगलें.
37व्या राष्ट्रीय खेळात 37 तरेच्या खेळाच्यो सर्ती जातल्यो आनी गोंय तातूल्या सगल्या प्रकारांत वांटो घेतलो अशी आस्त गावडे हांणी उक्तायल्या. राष्ट्रीय खेळाच्या आयोजनांत फकक राज्य खेळां असोसिएशनाच न्हय जाल्यार तालुको आनी गांव पांवड्या वयल्या क्लबांत लेगीत आसपावन घेवपाचो आपलो विचार आसा अशे तांणी शिश्टमंडळाक सांगलां.
बरोच तेप वाट पळयले उपरांत गोंयांत राष्ट्रीय खेळाचें आयोजन करपाचे निश्चीत जालां हे खातीर गुरूदास भक्ता आनी खोस उक्तावन गोंय सरकाराक ताच्या आयोजना खातीर सगळें सहकार्य दिवपाची तयारी दाखयल्या. गोंय ऑलिम्पिक असोसिएना वांगडच्या बसके वेळार गोंय खेळांं प्राधिकरणाची कार्यकारी संचालिका डॉ गीता नागवेकार, सहाय्यक सचीव नविन आचार्य, आर्विन सुवारीस, राजू मंगेशकार, जयेश नायक, सिद्धार्थ सातार्डेकार, निशी मडगांवकार आनी संदीप होबळे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
