भांगरभूंय | प्रतिनिधी
कर्नाटकांतली वेंचणूक जिखपाक केंद्र सरकारान म्हज्या गोंयच्या परशुराम- देवभूमीची जीवनदायिनी म्हादयचो फायदो घेतलो. डबल इंजिन सरकार आसल्यार राज्याची उदरगत जाता अशें सांगपी गोंय सरकारान आतां हें कित्याक घडलां तांची म्हायती लोकांक दिवचीं. ‘म्हादय कर्नाटकाक दिवन लेगीत गोंयच्या लोकां कडल्यान कांयच कागाळ ना. थंयचे लोक खावन-पोयोवन खोशी आसात, आंदोलन करीनात’ अशी भास केंद्रीय गृहमंत्री अमित शाहान गोंयच्या शिश्टमंडळा विशीं केल्ली आसूं येता.
हालींच बेळगांवां जाल्ले सभेंत उलयतना तांणी वादग्रस्त विधान केलें. गोंय सरकारान म्हादयचें उदक वळोवपा खातीर संमती दिल्या अशें विधान शहा हांणी केले. फकत आपली सुवात वांचोवपा खातीर गोंय सरकाराच्या मुखेल्यांनी म्हादय कर्नाटकांत वळोवपाक मान्यताय दिल्या जाल्यार तो लोकांचो विश्वासघात. उदक हें फकत मनशां खातीर न्हय तर दर एका जीवा खातीर गरजेचें पोशक तत्व आसा. आमी खाणां बगर कांय काळ जियेवंक शकतात पूण उदका बगर जियेवंक शकनात. उदकाची आपल्या खाशेल्या गुणांक लागून कुडीच्या पोशणांत म्हत्वाची भुमिका आसा. कुडीची निर्मिती आनी पोशण हातूंत उदकाचो म्हत्वाचो वांटो आसता. अशें खंयचेंय दुयेंस ना जांतूंत उदक पियेवपाक बंदी आसा.
फुडले पिळगेची पर्वा करिनासतना म्हादयची बळी दिवपाचें वृत्तीक खंयचोच शाणो मनीस तेंको दिवंक शकना. ह्या सरकारान कर्नाटकाक म्हादय दिल्याचे मान्य करून गोंयकारांची माफी मागची. म्हादयक वांचोवपाची आसल्यार सगळ्या लोकांक विस्वासांत घेवन निर्णायक लडाय करची पडटली. सगल्या पक्षाच्या फुडाऱ्यांक विस्वासात घेवन केंद्राचेर दबाव हाडपाक कृती करची पडटली. पूण ह्या सरकाराची तशें
करपाचें खरेंच इत्सा आसा
काय, असो प्रस्न आसा. ‘धर्तरी उदक आनी हवा हें उर्जेचे स्त्रोत आसात, देखून धर्तरेची आनी पर्यावरणाची राखण करप हें आमचें काम’.
गजानन बा. नायक भाटकार
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
