भांगरभूंय | प्रतिनिधी
म्हापशेंच्या सेंट झेवियर्स म्हाविद्यालयाच्या पंगडान गोंय विद्यापिठान आयोजीत केल्ले हॅण्डबॉल वस्तादपण सर्तींत दोट्टी किताब जिखलो. ताळगांव पठारा वयल्या विद्यापिठाच्या मैदानाचेर सर्तीचें आयोजीत केल्ले.
दादल्यांच्या गटांतले फायनलींत सेंट झेवियर्स म्हाविद्यालयान मडगांवच्या श्री दामोदर वाणिज्य आनी अर्थशास्त्र म्हाविद्यालयाक 24-20 अशा फरकांनी हारयलो. जाल्यार बायलांच्या गटांत सेंट झेवियर्सान नावेलीच्या रोझरी वाणिज्य आनी कला म्हाविद्यालया आड 4-3 फरकान जैत जोडलें.
ते पयलीं जाल्ले बायलांच्या गटांतले सेमी फायनलींत रोझरीन सांखळीच्या कला, विज्ञान आनी वाणिज्य म्हाविद्यालयाक 7-1 अशा एकवटेन फरकान हारयले. जाल्यार सेंट झेवियर्सान श्री दामोदर म्हाविद्यालयाक हारयलें.
दादल्यांच्या गटांतले सेमी फायनलींत श्री दामोदर म्हाविद्यालयान मिरामराच्या धेंपो कला आनी विज्ञान म्हाविद्यालयाक 12-10 अशा फरकान हारयलें. जाल्यार सेंट झेवियर्सान पणजीच्या डॉन बॉस्को म्हाविद्यालया आड 16-15 अशें जैत जोडलें.
दादल्यांच्या गटांत 29 आनी बायलांच्या गटांत 19 पंगडांनी वांटो घेतिल्लो. इनामां भेटवण सुवाळ्याक विद्यापिठाचे ग्रंथपाल डॉ. संदेश बी. देसाय मुखेल सोयरे म्हणून उपस्थीत आशिल्ले.
सेंट झेवियर्साचो बायलांचो पंगड असोः ब्रिनेला फर्नांडीस, रिचा गावडे, संतोषी नागेकार, प्रांजली सातार्डेकार, वियाना फर्नांडीस, पल्लवी चोडणकार, युक्ता महतो, अनोष्का डिसौझा, केझिया बार्रेटो, फ्लाविना रॉड्रिग्स, ब्रिजेट आल्बुकर्क, पुष्पा परब, प्रांजली सातार्डेकार, रोझेन फर्नांडीस, नमिता गोवेंकार आनी वीणा नायक.
सेंट झेवियर्साचो दादल्या पंगडः जोनाथन परेरा, लुईस रॉड्रिग्स, नॅथन क्लावेर डिसौझा, जेडन वाझ, रितेश सांगेलकार, स्टिफन डिसिल्वा, अशोक सातार्डेकार, जोशुआ डिसौझा, वालेरियस अॅंथनी फर्नांडीस, उत्कर्ष कासकार, क्लेरी ब्रिटो, जॉन डिसौझा, सोहन नायक, वेलरॉय ज्यो, रॉकी फर्नांडीस, रॉयस्टन आरावजो आनी ब्रॅण्डन डिकोस्टा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
