भांगरभूंय | प्रतिनिधी
भांगरभूंय । खबरां मेज
पणजीः कोयरान भरिल्ली पीकअप कुमारजुवें फेरी धक्क्या लागीं फनस्कूला कडेन रिकामी करपाचो प्रकार थळाव्या लोकांचे सादुरतायेक लागून येशस्वी जावपाक शकलो ना. फाटल्या आयतारा कुमारजुंव्या रावपी गोंय युथ काँग्रेस समितीचो उत्तर गोंय अध्यक्ष रिनाल्डो रुझारियो हांका ही पीकअप दिसली. ताणे पीकअप ड्रायव्हर आनी ताच्या वांगडा आशिल्ल्या तिगांची चवकशी केली तेन्ना ते रस्त्यार कोयर उडोवपाक आयिल्लें हें स्पश्ट जालें. रुझारियोन थळावो पंच वांगडी अनुज नायक आनी थळाव्या लोकांक आपोवन ताची म्हायती दिली.
रस्त्या कुशीक कोयर उडोवपाचे प्रकार जायत आसतात मात ते आडावपा खातीर सरकारी पांवड्या वयल्यान कांय जायना. ह्या गुन्यांवाक कसलीच ख्यास्त जायना. आपलो वाठार नितळ दवोरपाची जापसालदारी लोकांनी घेवपाक जाय अशें रुझारियोन सांगलें. मुखयमंत्री प्रमोद सावंत कोयर वेवस्थापन आनी नितळ भराताविशीं उलयतात मात कोयर वेगळो करपाचें वेवस्थापन तशेंच कोयर उडोवपा खातीर सुवात तयार करपाचें काम करनात अशें ताणे सांगलें.
लोकांनी पीकअप ड्रायव्हर आनी तांच्या वांगडा आयिल्ल्यान रस्त्यार उडयल्लो कोयर परत पीकअपींत घालपाक लागलें. हे सुवातेर सीसीटीव्ही बसोवपाचें उतर पंच वांगडी अनुज नायक हांणे दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
