भांगरभूंय | प्रतिनिधी
सीमा बेहरे: पेडण्यां जाली मानवाधिकार आनी विशाखा समितीचेर मार्गदर्शन कार्यावळ
पेडणें: भारताच्या संविधानान दरेका नागरिकाक तांचे अधिकार, मुळाव्यो गरजो, हक्क कायद्यान दिल्यात. हे हक्क मेळयतना जर आपल्याचेर अन्याय जाता जाल्यार ताचो निशेध करून मानव अधिकार संघटना वा पुलिसांकडेन संपर्क करचो. आपल्याचेर जावपी अन्याया आड उबें रावचें, अशें मानवाधिकार संघटन गोंय राज्य महिला मुखेली सीमा बेहरे हांणी कोरगांवच्या प्रज्ञा हायस्कूल सभाघरांत आयोजीत कार्यावळींत सांगलें.
मानवाधिकार आनी विशाखा समिती हाचेर मार्गदर्शन करपा खातीर हे कार्यावळीचें आयोजन केल्लें. केंद्रीय मानवाधिकार संघटनेन आयोजीत हे कार्यावळीचे माचयेर राज्य मुखेली सीमा बेहेरे, केंद्रीय मानव अधिकार संघटन उत्तर गोंय जोड सचीव निवृत्ती शिरोडकार, प्रज्ञा हायस्कुलाची मुख्याध्यापिका मिनी पीएस, शाहू फुले आंबेडकार प्रतिश्ठानाचे महादेव गवंडी, दिपाली रेडकार, दीपा हलवार आनी हेर मानेस्त हाजीर आशिल्ले.
मोबायलाचो वापर बर्या कामा खातीर करात
विद्यार्थ्यांनी मोबायलाचो वापर बर्या कामा खातीर करचो. एखाद्रो अनवळखी वा वळखिचो मनीस वलगर फोटो धाडटा तेन्ना आमी ताचे कडेन आकर्शीत जातात आनी नाका जाल्ल्यो गजाली घडटात. ह्या सगळ्याक थारो दिवचो. भुरग्यांनी जागृत रावन आपल्याचेर भौशीक सुवातांचेर वा शाळेंत अत्त्याचार जाता जाल्यार रोखडेंच तुमच्या लागींच्या मनशांक कळोवचें असो उलो सिमा बेहरे हांणी मारलो.
जे तरेन आमी खाजगी वा सरकारी कार्यालयांत, आस्थापनांत काम करतात ते सुवातेर आपल्याचेर आपले वरिश्ठ वा हेर चेंपण घालून काम करून घेतात. केन्ना केन्ना लैंगीक अत्त्याचारूय करतात. जांच्यो नदरो वायट आसता हाचेरूय आमी आवाज करचो. आवाज काडटना आपल्याचेर ह्यान फुडें केन्नाच अन्याय जावचो ना असो विश्वास दवरून पुलिसांकडेन वा मानव अधिकार संघटणे कडेन संपर्क करचो असो उलो सीमा बेहेरे हांणी दिलो.
विद्यार्थी जेन्ना शिक्षण घेतात वा कामार महिलांचेर अत्त्याचार जातात. हाचे आड दरेकल्यान उबें रावप गरजेचें. तशेंच हायस्कूल विद्यालयांत आनी सरकारी तशेंच खाजगी कार्यालयांत विशाखा समिती कार्यरत आसता. तेन्ना आमी अत्त्याचार करपी व्यक्ती आड हे समिती कडेन कागाळ करची. उपरांत ही समिती कारवाय करतली, अशें बेहरे हांणी फुडें सांगलें.
ह्या वेळार माचयेर हाजीर आशिल्ल्या हेर मानेस्तांनीय आपले विचार मांडले. कार्यावीक व्हडा संख्येन विद्यार्थी, शिक्षक, पालक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
