युवा जागृती कार्यावळीक उपाट प्रतिसाद

भांगरभूंय | प्रतिनिधी

देशभरांतल्यान 250 परस अदीक स्पर्धक

भांगरभूंय । खबरां मेज

पणजीः 11 फेब्रुवारीक पणजेच्या इन्स्टिट्यूट मिनेझीस ब्रागांझा सभाघरांत घडोवन हाडिल्ले युवा जागृती कार्यावळीक उपाट प्रतिसाद मेळ्ळो. गोंय राज्य जैवविविधता मंडळ, राष्ट्रीय जैवविविधता प्राधिकरण, इन्स्टिट्यूट मिनेझीस ब्रागांझा आनी अभिव्यक्ती हांच्या जोडपालवान हे कार्यावळीचें आयोजन केल्लें.

अंदूं युवा जागृती कार्यावळींत एक वेगळो प्रयोग केल्लो. तातूंत राष्ट्रीय युवा जागृती राष्ट्रीय पांवड्याचेर आनी गोमंत युवा जागृती गोंयांत प्रत्यक्ष स्वरुपांत आयोजीत केल्ली. ऑनलायन युवा जागृती खातीर फोटोग्राफी, रील आनी लघुपट हे सर्तीं खातीर 150 परस प्रवेशिका आयिल्ल्यो. ऑनलायन सर्ती खातीर सोबिता कुडतरकार, विजय रामनाथन, राजेश नाडकर्णी, साईनाथ उसकयकार आनी यशोधन गडकरी हे परिक्षक आशिल्ले.

देशभरांतल्यान 250 परस अदीक स्पर्धकांनी तातूंत नोंदणी केल्ली. तातूंत आसाम, मणिपूर, महाराष्ट्र, तामीळनाडू, दिल्ली, गुजरात, उत्तर प्रदेश, झारखंड, कर्नाटक, पश्चीम बंगाल, केरळ, ओडिशा, मध्यप्रदेश, राजस्थान, बिहार, नागालँड आनी गोंय ह्या 17 राज्य तशेंच केंद्रशाशीत प्रदेशांतल्या स्पर्धकांनी वांटो घेतिल्लो.

11 फेब्रुवारीक सकाळीं 8.30 वरांचेर नांव नोंदणी प्रक्रिया सुरू जाली. ते उपरांत ऑफलायन युवा जागृतीच्या उक्तावण सुवाळ्यांत गोंय राज्य जैवविविधता मंडळाचे वांगडी सचीव डॉ. सरमोकादम मुखेल सोयरे, इन्स्टिट्यूट मिनेझीस ब्रागांझाचे वांगडी सचीव गोरख मांद्रेंकार आनी अभिव्यक्तीची सचीव गीता मंगेशकार हाजीर आशिल्ली.

हे ऑफलायन सर्तींनी शालेय विद्यार्थ्यां खातीर नवरचीत गिताचेर चोंबो गायन सर्त आनी वण्टीचित्र सर्त जाल्यार उच्च विद्यालयीन तशेंच म्हाविद्यालयीन विद्यार्थ्यां खातीर पथनाट्य सर्ती घेतल्यो. ह्या सर्तीं खातीर पर्यावरणा कडेन संबंदीत विशय दिल्ले.

हे सर्तीं खातीर अनघा निनाद देशपांडे, प्रा. सागर गावडे, नितीन कोरगांवकार, राखी भिडे, आसावरी कुलकर्णी, शीतल गायतोंडे आनी अविनाश च्यारी हे परिक्षक आशिल्ले.

दनपारां 12.30 वरांचेर उक्ती माची कार्यावळ जाली. तातूंत वांटो घेतिल्ल्या तरणाट्यां खातीर तशेंच प्रेक्षकां खातीर तांच्यो कला सादर करपा खातीर माची उपलबध केल्ली.

इनामां भेटवण सुवाळ्यांत पर्यावरण मोगी राजेंद्र केरकार मुखेल सोयरे, इन्स्टिट्यूट मिनेझीस ब्रागांझाचे अध्यक्ष दशरथ परब विशेश सोयरे आनी गोंय राज्य जैवविविधता मंडळाचे वांगडी सचीव डॉ. प्रदीप सरमोकादम हाजीर आशिल्ले.

ऑनलायन सर्ती

रील सर्तः पयलें इनाम- जूड फर्नांडीस, दुसरें वैष्णवी झो जाल्यार तिसरें इनाम नेहाल साळकार हांकां फावो जालें.

फोटोग्राफी सर्तः पयलें इनाम- सत्यकी आचार्य, दुसरें शिबाशीश सहा (कोलकाता), तिसरें इनाम रतीन डे (पश्चीम बंगाल). उमेद वाडोवपी इनाम प्रितेश कटेलिया.

लघुपट सर्तः पयलें इनाम नेहाल हरिश्चंद्र च्यारी, दुसरें गोपिका कृष्णन (केरळ), तिसरें इनाम- ओंकार पेडणेंकार.

ऑफलायन सर्ती

वण्टीचित्र सर्तः पयलें इनाम सर्वोदया एड्युकेशनल सोसायटी हायस्कूल, दुसरें मातोश्री इंदिराबाई बाबुराव खांडेपारकार हायस्कूल, तिसरें सेंट थॉमस हायस्कूल, उमेद वाडोवपी पयलें चुब्बी चिक्स हायस्कूल आनी दुसरें मुष्टीफंड हायस्कूल.

नवें पर्यावरण गीत सर्तः स. श्री. विनायक दामोदर विद्यालय.

चोंबो गीत गायन सर्तः न्यू एड्युकेशनल हायस्कूल, दुसरें सर्वोदया एड्युकेशनल सोसायटी हायस्कूल, तिसरें डॉ. के. ब. हेडगेवार हायस्कूल. पथनाट्य सर्तः पयलें जीव्हीएम्स दादा वैद्य कॉलेज, दुसरें सर्वोदया एड्युकेशनल सोसायटी उच्च माध्यमीक, तिसरें कला मोगी, उमेद वाडोवपी निर्मला इन्स्टिट्यूट.