भांगरभूंय | प्रतिनिधी
खबरां संस्था
न्यूलंड, केप टावनः बायलांचे टी-20 संवसारीक करंड सर्तीची भारतान जैतान सुरवात केली. आपले पयले मॅचींत तांणी पाकिस्तानाक 7 विकेटींनी हारयलें. पाकिस्तानाच्या 149 धांवड्यांक भारतीय चलयांनी 3 बाद 151 अशी जाप दिवंन हें म्हत्वाचें जैत मेळयलें. जेमिमाह रॉड्रिग्ज, विकेटकीपर रिचा घोश आनी शेफाली वर्मा हांचे खेळीन भारताक हें व्हड जैत मेळोवन दिलें.
पाकिस्तानांक तांच्या डावांत 149 धांवड्याचेर आडायले उपरांत यास्तिका भाटिया आनी शेफाली वर्मान भारताक बरी सुरवात करून दिली. पंगडाच्यो 38 धांवड्यो जाल्ल्यो तेन्ना सादिया इक्बालान यास्तिकाक कॅच आवट केलें. ताणे 20 बॉलांत दोन चौक्यांनी 17 धांवड्यो केल्यो. सात ओव्हरींत पंगडाचो अर्दशेंकडो करून शेफाली आनी जेमिमा रॉड्रिग्जान पंगडाक जैताचे दिकेन व्हेलें. पंगडाच्या 62 धांवड्यांचेर शेफाली 25 बॉलांत 4 चौक्यांनी 33 धांवड्यो करून कॅच आवट जालं. 93 धांवड्यांचेर कॅप्टन हरमनप्रीत (16) आवट जालें. नासराच्या बॉलाचेर मरूफान ताची कॅच घेतली.
पंधरावे ओव्हरीत रॉड्रिग्ज आनी रिचा घोशान पंगडाचो शेंकडो पुराय केलो आनी 19वे ओव्हरींत भारताक जैत मेळोवन दिलें. जेमिमाहन 38 बॉलांत 8 चौक्यांनी नाबाद 53 आनी रिचान 20 बॉलांत 5 चौक्यांनी नाबाद 31 धांवड्यो केल्यो.
बिस्माह आयेशाची नाबाद खेळी
आयसीसीचे बायलाचें टी-20 संसवारीक सर्तींतल्या आपल्या ब गटांतल्या पयले मॅचींत भारतीय पंगडांक पाकिस्तानांक 20 ओव्हरींत 149 धांवड्यांचेर आडायलें. 3 बाद 43 अशे कठीण परिस्थितींतल्यान कॅप्टन बिस्माह मरूफ आनी आयेशा नसीम हांणी स्पोटक खेळी करून पंगडाक साल्वार केलें. तांणी पांचवे विकेटी खातीर 81 धांवड्यांची भागिदारी केली. मरूफान 55 बॉलांत 7 चौक्यांनी नाबाद 68 आनी नसीमान 25 बॉलांत 2 चौके आनी 2 सक्यांनी नांबाद 43 धांवड्यो केल्यो.
राधा यादव, दीप्ती शर्मा आनी पूजा वसत्रकर हांणी ओपनर मुनिबा अली (12) आनी जवेरिया खान (8) आनी निदा धर (0) हांकां 43 धांवड्यांत पॅव्हेलियनांत धाडिल्ल्यान पाकिस्तानाची स्थिती गंभीर जाल्ली. राधान अमिनाक (11) आवट करून तांची स्तिथी 4 बाद 68 अशी केली. पाकिस्तानाच्या ह्या खेळगडींक बाद करपाक भारताची विकेटकीपर रिचा घोषान म्हत्वाचें योगदान दिलें. मरूफ आनी नसीमान सादूरतायेन खेळून पंगडाचो स्कोर देडशेंच्या घरांत व्हेलो आनी म्हत्वाचें म्हणल्यार भारताच्या बॉलरांक आपल्यो विकेटी दिल्यो नात. राधा यादवान 21 धांवड्यांत 2 विकेटी घेतल्यो. दीप्ती शर्मा आनी पूजा वसत्रकर हांका दरेकी एक विकेट मेळ्ळी
————–
ऑस्ट्रेलियेन न्यूझिलंडाक हारयलें
खबरां संस्था
केप टावनः बायलाचें संवसारीक टी-20 क्रिकेट सर्तींतले आपले पयले मॅचींत ऑस्ट्रेलियेन न्यूझिलंडानक 97 धांवड्यांनी हारयलें. पयलीं खेळून ऑस्ट्रेलियाच्या पंगडान 9 बाद 173 धांवड्यो केल्यो. ओपनर एलिसा हिलीन 55, कॅप्टन मेग लैनिंग 41 आनी एलिसे पेरीन 50 धांवड्यो केल्यो. न्यूझिलंडाच्या ताहू आनी एमिला केर हांणी देरकी 3 विकेटी घेतल्यो.
न्यूझिलंडाचो पंगड फकत 14 ओव्हरींत 76 धांवड्यो करपाक शकलो. ऑस्ट्रेलियेची ऑफ ब्रेक स्पीनर एशले गार्डनरान 5 विकेटी घेतल्यो. टी-20 संवसारीक सर्तींत ऑस्ट्रेलिये वतीन ताची ही सगळ्यांत बरी कामगिरी आसा. न्यूझिलंडाची ओपनर शून्याचेर बाद जालीं. सूजी बॅट्स आनी कॅप्टन सोफी डेविन पयल्याच बॉलांत आवट जाली. मेगन शट हिणे तांकां आवट केलें. न्यूझिलंडाचो डाव ह्या उपरांत गडगडत गेलो. एमेलिया केरान सगळ्यांत चड 21 धांवड्यो केल्यो. न्यूझिलंडाच्या 8 खेळगडींक 10 धांवड्यो करपाक शक्य जालें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
