भांगरभूंय | प्रतिनिधी
आतां मेरेन 75 लाखांचे 347 दावे दाखल
भांगरभूंय I प्रतिनिधी
पणजी : केंद्र सरकारच्या ‘आयुष्मान भारत’ येवजणेक गोंयकारां कडल्यान उपाट प्रतिसाद मेळटा. एप्रील 2022 ते 29 जानेवारी 2023 ह्या 10 म्हयन्यांच्या काळांत 10,067 जाल्यार जाणांनी हे येवजणेचो लाव घेतलो. जाल्यार आतां मेरेन वट्ट 10,747 गोंयकारांनी हे येवजणेचो लाव घेतला. तशेंच आतां मेरेन येवजणे खाला 75 लाखांचे 347 दावे दाखल जाल्यात.
लोकसभेंत विचारिल्ल्या लेखी प्रस्नाचे जापेंत केंद्रीय भलायकी मंत्री मनसुख मांडवीय हांणी ही म्हायती दिल्या. तांणी जापेंत, 2020-21 आनी 2021-22 ह्या दोन वर्सांच्या काळांत राज्यांतली वट्ट 27 हॉस्पिटलां हे येवजणे खाला अाशिल्ली आनी दोन वर्सांत 680 जाणांनी येवजणेचो लाव घेतिल्लो. ते उपरांत एप्रील 2022 ते 29 जानेवारी ह्या 10 म्हयन्यांत 10,067 जाणांनी येवजणेचो लाव घेतला. आनी 29 जानेवारी 2023 मेरेन 37 हॉस्पिटलां हे येवजणे खाला आयल्यात.
आयुष्मान भारत येवजणेचो लाव घेतिल्ले 75 लाखांचे 347 दावे आतां मेरेन दाखल जाल्यात. 2019-20त 12 लाखांचे 48, 2020-21त 26 लाखांचे 133 आनी 2021-22त 37 लाखांचे 166 दावे दाखल जाल्यात, अशी म्हायती मंत्री मांडवीय हांणी लेखी जापेंत दिल्या.
एखाद्याचें नांव लाबार्थ्यांचे वळेरेंत नासत अानी तो हे येवजणेक पात्र आसत जाल्यार आयुष्मान इश्टांचे मजतीन हे येवजणे खाला तांची नोंदणी जावपाक शकता. तशेंच गोल्डन कार्ड लेगीत हॉस्पिटलांत तयार करतात.
येवजणे खाला जायत्या प्रकारांच्या गंभीर दुयेंसांचेर उपचार करतात. जातूंत दुयेंतीक हॉस्पिटलांत दाखल करपा पयलीं आनी हॉस्पिटलांतल्यान डिस्चार्ज मेळ्ळे उपरांत जावपी खर्च लेगीत सरकारा कडल्यान खर्च करचो पडटलो.
येवजणेचे लाव घेवपाक लाबार्थ्यांचे आधार कार्ड गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
