भांगरभूंय | प्रतिनिधी
भारतीय बायलांचो आदर्श दुबळो आसना अशें म्हाका दिसता. घोवा बरोबर चलतली वा पडटली, जंय घोव थंय हांव, जंय ताची इत्सा, थंय हांव. असल्या बरेपणा मुखार हांव म्हजी तकली बागयतां, म्हाका घुंवळ येता. सुदारपाच्यो वेगवेगळ्यो वाटो आसात आनी होय एक तातूंतलोच उपाय आसत. भारतीय बायलांचो हो आदर्श सगळ्यांक मानवतलो अशें ना. भारतीय बायलांचो आदर्श आयज दुबळो जाला. तो कडक जावचो इतलेंच म्हाका म्हणपाचें आसा. घटस्फोटाचो कायदो जाल्यार हांव ताचेर कांयच उलोवपाचों ना. पूण प्रेम, त्याग, सहकार्य, सुदारप ह्या शब्दांक कितेंय अर्थ उरचो अशें दिसता जाल्यार घोवा बायलेन खंयचेय परिस्थितींत त्याग करप हेंच व्हडलें व्हडपण आसा. तातूंत मनीसकाय आसा आनी मनशाचें व्हडपण आसा. भारतीय बायलांच्या व्रतांतलीं दुबळेपणां वचून कडकपणां येवचीं तशेंच तांच्या प्रेम-वृत्तींत व्हडपण येवचें, बायलेच्या प्रेमाक खोलाय आसता पूण ताका लांबी रुंदी आसना. तांचे नदरेची मर्यादा ल्हान आसता. घराब्या भायर तांचें व्हडलेशें लक्ष आसना आनी ह्या खातिरूच बायलां झगड्याक जबाबदार अशें घराब्यांत म्हणटात. बायलांचो आवाठ व्हड जावंक जाय. हे वटेनच्या ते वटेनच्या लोकांचोय तांणी विचार करपाक जाय. संवसारांतल्या सूख दुख्खाची कल्पना तांकां आसूंक जाय. भेदभाव कमी करपाक जाय. घोव आनी आपलीं भुरगीं बाळां हाचे फुडें दर ना अशें तांकां दिसूंक जायना.
वकीलाचे बायलेक दिसतालें की “आपूण सुखी आसा, आपलो घोव खूब पयशे मेळयता. आपल्या भुरग्यां बाळाक कपडे आसात, तांकां सारकें शिक्षण दिवपाक मेळटा, रावपाक बरो बंगलो आसा, घरांत फोन आसा, काम करपाक मनशां आसात” पूण तिणें नदर व्हड करपाक जाय. “हे पयशे खंयच्यान येता? म्हजो घोव वायट कांय करना न्ही? शेतकारांचीं झगडीं सोडोवपा वाट्याचीं तीं कशीं वाडटलीं हें तर तो पळयना न्ही? म्हजो घोव म्हज्या आंगार बर्यो भांगराच्यो वस्ती घालता, म्हजे खातीर बरीं बरीं कापडां हाडटा. पूण ह्या खातीर दुसरो कोणच उगडो पडना न्ही?” हाचो विचार बायलेन करूंक जाय.
वेपार्याचे बायलेन अशेंच मनांत विचारपाक जाय, “म्हजो घोव गरिबांक त्रास करना न्ही? गरिबांचीं भुरगीं-बाळां उपाशीं पडनात न्ही? अती फायदो करून घेना न्ही? अती कळंतर घेना न्ही? परदेशी म्हालाचो वेपार करना न्ही?” सरकारी नोकराचे बायलेन म्हणूंक जाय, “म्हजो घोव लांच घेना न्ही? खंयच्यान येतात हे पयशे खंयच्यान येता हें तूप, भाजीपालो? म्हजो घोव अन्यायान बी वागना न्ही? अन्यायी कायद्याची कारवाय तो करना न्ही? लोकांचीं कामां खर्या हितानच करता न्ही?”
भारतीय बायलो अशे प्रस्न आपल्याक मनाक केन्नाच विचारी ना? घोव तांकां काळखांत दवरतात. पूण घोव जर पाप करतना तर त्या पापांत त्योय वांटेकार आसतात हें तांणी विसरूंक जायना. म्हजो घोव सावकार म्हणून हजारो शेतकारांक रडोवन जर म्हाका शालू घेता, म्हजो दोतोर घोव गरिबां कडल्यान कश्याय कशी फी घेवन म्हाका म्हालांत दवरता, म्हजो अधिकारी घोव लोकांक त्रास दिवन जर पयशे मेळयता असो विचार भारतीय बायलांच्या काळजांत जागो जालो तर त्यो सामक्यो उठतल्यो कित्याक तर धर्म हो भारतीय बायलांची जीण आसा.
फुडें चालू…
मूळ लेखकः साने गुरुजी,
अणकारः पांडुरंग नाडकर्णी
पांडुरंग नाडकर्णी
9326139252
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
