म्हादय खातीर पत्रकार वझे सर्वोच्च न्यायालयांत

भांगरभूंय | प्रतिनिधी

पर्यावरण मंत्रालय, कर्नाटकाक धाडिल्ली नोटीस तांच्याच अर्जा वयल्यान

भांगरभूंय I प्रतिनिधी
पणजी : दिवचलचे ज्येश्ठ पत्रकार विशांत वझे हांणी म्हादय आनी भीमगड अभयारण्या सरभोंवतणच्या इको सेन्सिटिव्ह झोन संदर्भांत केल्ल्या अर्जा प्रमाणूच, सर्वोच्च न्यायालयान केंद्रीय पर्यावरण मंत्रालय आनी कर्नाटक सरकाराक तीन दिसां पयलीं नोटीस जारी केल्या.
म्हादय अानी भीमगड ह्या दोन अभयारण्यांचो कर्नाटकांतलो वाठार इको सेन्सिटिव्ह झोन म्हूण अधिसुचीत करचो, अशी मागणी करपी अर्ज पत्रकार विशांत वझे हांणी सर्वोच्च न्यायालयांत केल्लो. केंद्रीय पर्यावरण मंत्रालयान मसुदो जारी करुन अधिसुचोवणी अजून अधिसुचीत करूंक ना. पर्यावरण मंत्रालयान जो वाठार इको सेन्सिटिव्ह झोन खातीर निश्चीत केला, त्याच वाठारांत कळसा-भांडुरा प्रकल्प येतात. हे प्रकल्प उबारल्यार ताचो ह्या दोनूय अभयारण्यांचेर परिणाम जावन थंयची जैवविवीधता धोक्यांत येतली. ताका लागून पर्यावरण मंत्रालयान बेगोबेग इको सेन्सिटिव्ह झोन अधिसुचीत करचो, असो दावो वझे हांणी अर्जां वरवीं केल्लो. तांच्या ह्याच अर्जाचे फाटभुंयेर सर्वोच्च न्यायालयान पर्यावरण मंत्रालय आनी कर्नाटकाक नोटीस जारी केल्या.

केंद्रीय पर्यावरण मंत्रालयान 25 फेब्रुवारी 2015त म्हादय अभयारण्या पसून गोंयचे वटेन एक किमि. क्षेत्र इको सेन्सिटिव्ह झोन म्हूण अधिसुचीत केल्ल्याची अधिसुचोवणी जारी केल्ली. पूण असो झोन कर्नाटकाचे वटेन अधिसुचीत करूंक ना.
कर्नाटकान ज्या कळसा नाल्याचेर धरण प्रकल्प उबारपाचें नियोजन केलां, हो वाठार कर्नाटक वटेन म्हादय अभयारण्या पसून एक किमि. क्षेत्रांत आसा. ताका लागून कर्नाटकान ह्या प्रकल्पाचें काम पुराय केल्यार म्हादय अभयारण्याचो विध्वंस जावन ताचे व्हड परिणाम थंयचे रानजीव तशेंच जैवीक संपदेचेर जातले.
7 जानेवारी 2016 दिसा केंद्रीय पर्यावरण मंत्रालयान भीमगड अभयारण्या पसूनच्या 4.83 किमि. वाठारांतले क्षेत्र इको सेन्सिटिव्ह झोन म्हूण अधिसुचीत करपा संदर्भांतलो मसुदो जारी केल्लो. पूण तो मसुदो अजून अधिसुचीत जावंक ना.
कर्नाटकांतल्या भीमगड अभयारण्या पसून 2.4 किमि. अंतराचेर अाशिल्ल्या भांडुरा नाल्याचेरूय कर्नाटकान धरण प्रकल्प उबारपाचे थारायलां.