भांगरभूंय | प्रतिनिधी
सप्तकी बाजारा दिसा मार्केटांत सुदैवान व्हड दुर्घटना टळ्ळी
म्हापशें: हांगासरल्या मार्केटांत जिवी वीज वाहिनी तुटून सकयल पडली. पूण सुदैवान कसलीच दुर्घटना घडली ना. आयज सप्तकी बाजाराचो दीस आशिल्ल्यान बाजारपेठेंत व्हड प्रमाणांत गर्दी आशिल्ली. वीज वाहिनी सकयल पडटकूच विक्रेते आनी लोकांची धांवपळ जाली. रोखडेंच पालिकेन आनी वीज कर्मचाऱ्यांनी ही वाहिनी जोडून वीज पुरवण सुरळीत केली.
शुक्रारा दनपारां 12.30 वरांच्या सुमाराक ही घडणूक घडली. बाजारपेठेंतल्या म्हापसा बाजार ह्या दुकानाच्या शेजरा आशिल्ल्या वीज खांब्यार शॉर्टसर्कीट जावन मोटो आवाज येवन एक वीज वाहिनी तुटून सकयल पडली.
ही वाहिनी पदविक्रेत्यांचेर तशेंच बाजारांत खरेदी खातीर भोंवपी लोकांचेर पडली. वाहिनी पडटकूच विक्रेते आनी लाेकांनी बोवाळ घालो आनी सुरक्षीत थळार धांव घेतली. उपरांत घडणुकेची म्हायती पालिका वीज खात्याच्या अधिकाऱ्यांक दिली. तांणी घडणूक थळार धांव घेवन तुटिल्ली वाहिनी उबारून जोडली आनी वीज पुरवण सुरळीत केली.
घडणूक थळार वीज खांब्याचे सकयल पान आनी हेर साहित्य घेवन विक्रेत्यांनी आपलें बस्तान मांडलां. तशेंच सप्तकी बाजाराचो दीस आशिल्ल्यान रस्त्याच्या मदेकांत पदविक्रेत्यांनी आपलें बस्तान मांडिल्लें.
तुटून सकयल पडिल्ल्या ह्या विद्युतभारीत वीज वाहिनीचो वीज पुरवण खंडीत जाल्लो. ताका लागून कोणाकूच दुखापत जाली ना. ही जर विद्युतभारीत स्थितींत वाहिनी सकयल पडिल्ली जाल्यार बाजारांत व्हड उज्याची दुर्घटना घडून भिरांकूळ उज्याची समस्या उप्रासपाची.
बाजारपेठेंतल्यो चडशो सगल्योच वीज वाहिन्यो जीर्ण जाल्यात आनी तुटून सकयल पडपाचे तशेंच शॉर्टसर्कीट जावपाचे प्रकार सेगीत घडत आसात. ताका लागून ह्यो वाहिन्यो बदलच्यो अशी मागणी वेपारी संघटणेचे अध्यक्ष श्रीपाद सावंत हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
