भांगरभूंय | प्रतिनिधी
डॉ. पर्येंकार: जुवारीनगर ‘लघू फिल्मा खातीर पटकथा लेखन’ विशयाचेर कार्यशाळा
वास्को:दर्जेदार कथा निर्माण करतलो जाल्यार सशक्त कथा आसप म्हत्वाचें आसता. उत्कृश्ठ कथेच्या आदारान कल्पक पटकथा आनी जिवंत संवाद लेखन करप ही फिल्म निर्मितीची मुळावी गरज आसा, अशें नामनेचे लेखक आनी राष्ट्रीय चित्रपट पुरस्कार फावो जाल्ल्या ‘काजरो’ ह्या कोंकणी फिल्माचे कथाकार डॉ. प्रकाश पर्येंकार हांणी सांगलें.
ते जुवारीनगरच्या एम. ई. एस. वसंत जोशी म्हाविद्यालयाच्या कोंकणी विभागान, वाणिज्य विभागाच्या जोडपालवान, कोंकणी राजभास दिसा निमतान आयोजीत केल्ल्या ‘लघू फिल्मा खातीर पटकथा लेखन’ विशयावेले कार्यशाळेच्या उक्तावण सुवाळ्याक मुखेल सोयरे म्हाणून उलयताले.
ह्या वेळार माचयेर म्हाविद्यालयाची प्राचार्य डॉ. मनस्वी कामत, कोंकणी विभाग मुखेली डॉ. कॉज्मा फेर्नांडीस, वाणिज्य विभाग मुखेली डॉ. सांचिलियाना फारिया हाजीर आशिल्लीं. आमच्या भारत देशांत आयज मेरेन कोणेंच सांगूंक नाशिल्ल्यो हजारांनी कथा आसात. ह्या कथांचो सोद घेवन फिल्मांच्या माध्यमांतल्यान त्यो कथा सगळे कडेन पावोवपाची जापसालदारकी आमी स्विकारपाक जाय अशें डॉ. पर्येंकार हांणी सांगलें. कथेचे अंतरंग समजून घेवप आनी फिल्माची गरज वा मागणी लक्षांत घेवन तशेंच विकसीत तंत्राची जाणीव मतींत दवरून पटकथा लेखन करपाचो सराव केलो जाल्यार आमी बरी पटकथा बरोवंक शकता अशें डॉ. प्रकाश पर्येंकार हांणी शेवटाक सांगलें.
आपल्या येवकाराच्या उलोवपांत प्राचार्य डॉ. मनस्वी कामत हांणी सांगलें, विद्यार्थ्यांक फिल्माकडेन एक सशक्त वेवसाय हे नदरेन पळोवपाक आनी ह्या वाठारांत आपलें भवितव्य घडोवपाक मोटो वाव आसा अशें सांगलें.
आयज कोंकणी भाशेची चारूय वटेन उदरगत जाल्या ती आमच्या म्हालगड्यांनी कोंकणी भाशेची राखण करपा खातीर आपलें तन मन धन दिलें. कोंकणी राजभास जावची हे खातीर कोंकणी लोकांनी आपलें सर्वस्व दिलें. वेळा प्रसंगी आपलो जीव लेगीत दिवपाक फाटीं रावले नात अशें डॉ. कामत हांणी सांगलें.
सुरवातेक प्राचार्य डॉ. मनस्वी कामत हांणी येवकार दिलो. कोंकणी विभाग मुखेली डॉ. कॉज्मा फेर्नांडीस हांणी प्रास्तावीक आनी मुखेल सोयर्यांची वळख करून दिली. प्रा. प्रिती परब, प्रा. पुनम शर्मा, प्रा. प्राची दामले आनी कु. रिविया इस्तेबॅरो, हांणी सोयर्यांक फुलां भेटयली. प्राचार्य डॉ. मनस्वी कामत हांचे हस्तुकी मुखेल सोयर्यांक भेटवस्त दिली.
हे कार्यशाळेंत वेंचीक विद्यार्थ्यांनी वांटो घेतलो. पुराय दीस डॉ. प्रकाश पर्येंकार हांणी कार्यशाळेंत विद्यार्थ्यांक विवीध विशयांचेर मार्गदर्शन केलें. कार्यशाळेंत वांटेकार जाल्ल्या विद्यार्थ्यांक डॉ. प्रकाश पर्येंकार हांणी प्रमानपत्रां भेटयलीं. सुत्रसंचालन प्रा. सत्यवान नायक हांणी केलें. प्रा. सांचिलियाना फारिया हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
