भांगरभूंय | प्रतिनिधी
राज्यपाल पिल्लई: ‘दी टेल ऑफ अ सक्सेस जर्नी’ पुस्तकाचें जालें लोकार्पण
मुरगांव: भारतांतल्या शिक्षणीक संस्थांनी शिक्षणांत आपले आवय भाशेक प्राधान्य दिवचें. गोंयां सयत केरळ, कर्नाटक आनी महाराष्ट्रांत लोक कोंकणी भाशेचो वापर व्हडा प्रमाणांत करतात. ताका लागून कोंकणी भाशेचो प्रसार आनी उदरगत ह्या राज्यांनी जावपाक जाय. हाचोच एक वांटो म्हणून गोंय विद्यापिठा वरवीं केरळांतल्या कोची शारांत तशेंच कर्नाटकांतल्या मंगळूर शारांत कोंकणी शिक्षणीक संस्था स्थापन करतले, अशें राज्यपाल पी. एस. श्रीधरन पिल्लई हांणी सांगलें.
जुवारीनगराच्या एम. ई. एस. म्हाविद्यालयाचे संस्थापक प्राचार्य एम. एस. कामत हांणी बरयल्ल्या पुस्तकाच्या प्रकाशन सुवाळ्याक राज्यपाल मुखेल सोयरे ह्या नात्यान ते उलयताले.
ह्या वेळार माचयेर खासा सोयरे म्हणून कोंकणी लेखक आनी ज्ञानपीठ पुरस्कार जैतिवंत दामोदर मावजो, लेखक आनी मुरगांव शिक्षणीक संस्थेचे अध्यक्ष एम एस कामत, मुरगांव शिक्षणीक संस्थेचे अध्यक्ष परेश जोशी, भास्कर नायक, प्रा. ललिता जोशी, एम. ई. एस. म्हाविद्यालयाची प्राचार्य डॉ. मनस्वी कामत हाजीर आशिल्लीं.
मुरगांव शिक्षण संस्थेच्या कला आनी वाणिज्य म्हाविद्यालयाक अंदूं 50 वर्सां पुराय जाल्यांत. हे संस्थेन आतां मेरेन सामान्य गोंयकारांचें हीत जपलां. ह्यान फुडेंय हे संस्थेन लोकांचें हीत सांबाळचें आनी अखंड सेवा करची असो उलो राज्यपालान दिलो.
ह्या वेळार राज्यपालान एम. ई. एस. कला आनी वाणिज्य म्हाविद्यालयाचें नांव बदलून एम. ई. एस. वसंत जोशी कला आनी वाणिज्य म्हाविद्यालय अशें केलें.
चार वण्टीं भितर मेळटा तें शिक्षण न्हय. जुवारीनगराच्या ह्या सड्यार म्हाविद्यालयाचे संस्थापक वसंत जोशी हांणी झाडां-पेडां रोवन शिक्षणीक संकूल तयार केल्लें. आयज हें संकूल 50 वर्सांचें जालां. ताचो लाव समाजाच्या दरेका घटकान घेवचो अशें दामोदर मावजो हांणी सांगलें.
ह्या वेळार राज्यपाल पिल्लई हांचे हस्तुकीं एम. एस. कामत हांणी एम. ई. एस. संस्थेच्या 50 वर्सांच्या इतिहासाचेर आदारून ‘दी टेल ऑफ अ सक्सेस जर्नी’ ह्या पुस्तकाचें लोकार्पण केलें. ह्या वेळार राज्यपाला हस्तुकीं प्राचार्य एम. एस. कामत, ज्ञानपीठ जैतिवंत दामोदर मावजो, एम. ई. एस. संस्थेक मजत करपी सुवर्ण बांदकार आनी सीमा बांदेकार हांचो भोवमान जालो.
कार्यावळीचें सुत्रसंचालन डॉ. सिदालिया बोदडे हांणी केलें. जाल्यार म्हाविद्यालयाचे प्राचार्य डॉ. मनस्वी कामत हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
