भांगरभूंय | प्रतिनिधी
मडगांवः नागवाडो बेताळभाटी वाठारांत भाड्याक रावपी डॉ. निशांत (निर्वाण) भारत (27, मूळ बिहार) हाचो खून जाल्ल्याचें बुधवारा राती कडेन उजवाडाक आयलें. ताची कूड हातपांय बांदिल्ले स्थितींत खाटी पोंदा आशिल्ली. ताचे वांगडा रावपी ताचो रांदपी फरार जाला. पुलीस ताचो सोद घेतात.
डॉ. भारत हे दोळ्यांचे दोतोर आशिल्ले आनी ते नुव्यां आय कॅर हॉस्पिटलांत सेवा दिताले. बेताळभाटी क्विनी रेसिडेन्सीच्या दुसऱ्या माळ्यार ते रावताले. बुधवारा दीसभर तांणी मोबायल घेवंक ना, तशेंच हॉस्पिटलांत कोणाकूच फोन करूंक ना. हे खातीर हॉस्पिटलांतल्यान कर्मचारी तांच्या घरा आयले, तेन्ना हो खुनाचो प्रकार उजवाडाक आयलो.
डॉ. भारत हांचे वांगडा तांचो रांदपी रावतालो. मंगळारा राती कडेन रांदपी आनी ताचे तीन इश्ट तांच्या घरा आयिल्ले तांणीच हो खून केला आसुंये, असो मुळावो दुबाव आसा. दोतोराचो मोबायल, पयशे आनी मोटार घेवन रातच्या 9 वरांचेर दुबावीत पळून गेले. पुलीस सीसीटीव्ही फुटेज तपासतात. दोतोराची कूड दक्षीण गोंय जिल्हो हॉस्पिटलांत दवरल्यात. खुना फाटल्यान चोरयेचो उद्देश आसुये, असो मुळावो अदमास आसा. कोलवें पुलीस निरिक्षक थेरन डिकॉस्टा हांणी खुनाचो गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
